|
حالة هذا الاسبوع ( 120 )
" مفيش حول والله "
كل يوم ياجماعة باشوف المرضى دول سواء جايين يكشفوا عشان
فاكرين ان عندهم حول أو جايين بعد ما عملوا العمليه برضه
مش مبسوطين وحاسين ان لسه عندهم حول وكلهم في الحقيقه
عندهم حق .. شكلهم فعلاً عندهم حول .. لكن في الحقيقه هما
معندهمش حول حقيقي لكن ظاهرياً كده تحس ان عندهم حول ..
الحول اللي عندهم ده اسمه " حول كاذب " .. يعني تحس ان
عندهم حول .. وهما مش كده خالص ..
زي الولد اللي في الصوره دي .. الولد شكله أحول فعلاً ..
صورته قدامكم واضحه جداً .. معقوله ده معندوش حول .. "
مفيش حول والله " .. شوفوا لما قرصت على مناخيره من فوق
عشان ابعد جفنه اللي كاسي على عينيه بقى شكله طبيعي خالص
.. مفيش حول ولا حاجه .. والدليل ان مفيش حول هو
" النقطه البيضا "
ايه موضوع النقطه البيضا ده ؟
قبل اختراع الموبيلات الجديده واكتشاف النقطه البيضا دي
كنت باتعب جداً عشان أرد على الاسئلة دي:
·
انا عملت العملية امبارح يا دكتور بس لسه حاسس ان عيني
فيها حول ؟
·
اصحابي بيقولوا عيني لسه حوله وحضرتك بتقول لأ مفيش حول ؟
·
والنبي صارحني يادكتور العملية بتاعتي نجحت ولا لأ ؟
·
عايزة اعرف ابني عنده حول ولا لأ ؟
·
رحت لدكاتره كتير بس كلهم قالوا ان ده حول كاذب ؟
طيب .. اشرح لكم موضوع النقطه البيضا وازاي ريحتنا ..
وازاي ريحت المريض نفسه وعرفته ازاي يعرف لوحده هل عنده
حول ولا لأ .. وازاي يعرف لوحده عمليته نجحت ولا لأ من غير
حتى ما يسأل الدكتور
ايه موضوع النقطه البيضا دي يا جماعه
في منتهى البساطة .. امسك الموبايل .. شغل الكاميرا .. شغل
الفلاش .. امسك الموبايل قدامك على طول .. بص قدامك مش
للجنب .. التقط صوره بالفلاش وانت باصص قدامك على طول ..
اخدت الصوره خلاص
.. اسمع بقى
ازاي تعرف في البيت لوحدك أن العين فيها أي حول حتى لو
بسيط ولا مفيش
بصوا يا جماعة على الصوره .. كبروا الصوره .. كبروا كمان
بصوا على النقطه البيضا الصغيره اللي هي انعكاس الفلاش على
العين .. بصوا عليها كويس وشوفوا النقطه البيضا موجودة فين
لو النقطه البيضا موجودة في وسط النني في عين .. بس مش في
وسط النني في العين التانية .. يبقى فيه حول .. قولاً
واحداً
ولو النقطه البيضا دي موجوده في وسط النني بالظبط في العين
اليمين وبرضه في وسط النني بالظبط في العين الشمال يبقى
مفيش أي حول .. قولاً واحداً برضه . . مفيش حول يعني مفيش
حول .. ما دام النقطه البيضا في وسط النني يبقى خلاص ..
مينفعش بعد كده نقول بس انا حاسس أن عيني دي داخلة لجوة
شويه .. ولا نقول عيني دي فيها حول شويه .. ولا نقول
اصحابي بيقولوا ان عيني لسه فيها حول .. ولا ييجي عيان
يقول لي هي عمليتي ناجحة يا دكتور جمال ؟
.. شوف انت بنفسك .. مش لازم انا اقول لك .. شوف
النقطه فين واحكم بنفسك ..
خلاص يا جماعه .. الموضوع واضح كده .. واضح ازاي تعرف أو
تعرفي عمليتك ناجحه ولا لأ .. واضح ازاي تعرفي ابنك عنده
حول ولا لأ ..
د.
جمـــال صبحي |
.jpg)
