|
حالة هذا الاسبوع
الحول
الكاذب
" ابنك معندوش حول يا مدام "
كل يوم ياجماعة باشوف البيبيهات دول اللي عندهم الحول
الكاذب ده .. معندهمش حول حقيقي لكن ظاهرياً كده تحس ان
عندهم حول .. وامهاتهم يا عيني عمالين يلفوا بيهم على
دكاترة مصر كلها ومصرّين ان ولادهم عندهم حول .. وهما ولاد
طبيعيين تماماً وزي الفل والحول اللي عندهم ده اسمه "
الحول الكاذب " .. يعني شكلهم كده .. خلقتهم كده .. تحس ان
عندهم حول .. وهما مش كده خالص .. كل يوم ياجماعة .. بقول
الكلام هو هو .. نفس الكلام
" ابني يا دكتور جمال عنده 8 شهور .. عنده حول من ساعة ما
اتولد .. رحت بيه لدكاترة كتير .. كلهم قالوا نفس الكلام :
ابنك معندوش حول يا مدام
.. ازاي يعني معندوش حول .. ده كل الناس بيقولوا
لي ابنك أحول .. كل قرايبي وجيراني بيقولوا لي ابنك أحول
.. ماهو قدامك أهو .. بذمتك ده معندوش حول "
في الحقيقة يا جماعة .. الولد ظاهرياً
كده شكله أحول
فعلاً .. الست والله عندها حق .. صورته قدامكم واضحة جداً
.. المهم .. قمت كشفت على البيبي .. فحصت له حركات العين
وقاع العين واختبارات تمركز العين ودرجة الانكسار .. نظره
يعني .. وحاجات تانية كده .. اكتشف بعدها فعلاً ان البيبي
سليم .. معندوش حاجة .. زي
الفل
" ابنك فعلاً يا مدام زي الفل .. معندوش حاجة والله ..
معندوش أي حول .. ده اسمه يافندم " الحول الكاذب " أو "
الحول الظاهري "
طيب ايه هو ياجماعة موضوع " الحول الكاذب " ده
فيه حاجات كتيرة بتخلي البيبي شكله أحول لكن هو في الحقيقة
بيكون طبيعي خالص .. شكل وشه مثلاً .. شكل عينيه نفسها ..
الجبهة .. الانف .. الجفون .. الخ ..
يعني مثلاً لما يكون الانف من فوق عريض شوية زي البيبي
اللي في الصورة دي .. العين لما تبص للجنب بتستخبى ورا
الانف العريض ده ويبان البيبي كأنه أحول .. ومثلاً لما
تكون العين مايلة شوية .. والجفون نازلة من الجنب شوية ..
زي العيال الصينيين كده .. تبصي للبيبي تفتكريه أحول ..
وهو طبيعي خالص .. ده بنسميه حول ظاهري .. يعني مش حول بجد
.. عشان كده بنسميه برضه " الحول الكاذب "
.. الحول الكاذب يا جماعة مش مرض .. مش محتاج أي
علاج .. علاجه الوقت .. كام سنة كده .. البيبيهات دول
هيكبروا شوية .. راسهم الصغيرة دي هتكبر شوية .. عينيهم
كمان هتكبر وهتبعد عن بعض شوية .. الجفون اللي داخلة على
العين دي هتبعد هي كمان شوية بشوية .. يعني كل الاسباب
اللي خلت شكلهم أحول هتختفي شوية بشوية كل ما يكبروا ..
ونلاقي في الآخر شكلهم بقى طبيعي خالص ..
فعلاُ والله " ابنك معندوش حول يا مدام "
د. جمـــال صبـــحي
|
.jpg)
