حالة هذا الاسبوع ( 55 ) احمد .. 41 سنة من ينبع .. السعودية

" الحول الرأسي "

فيه حاجتين مهمين بتخلي الحول ده يا جماعة من اصعب انواع الحول اللي بنشوفها .. اولاً تشخيص العضلات المسئولة عن الحول ده صعب جداً ومحتاج اجهزة معينة وفحص دقيق لأن بيخش في تشخيصه 4 عضلات مختلفة وكتير من الدكاترة بيتلخبطوا فيهم وساعتها بتكون النتيجة كارثية .. ثانياً عمليات اصلاح الحول الرأسي من اصعب عمليات الحول .. ازاي عين مرفوعة بالمنظر ده ننزلها لتحت بأجزاء من الملليمتر من غير مشاكل .. ازاي مثلاً الجفن العلوي نحافظ على مكانه من غير ما ينزل مننا لتحت .. ازاي مثلاً ننزل العين لنفس المستوى الافقي بتاع العين التانية بالظبط .. لو فرقت نص مللم ياجماعة بتبقى مصيبة .. هتبقى عين أعلى أو أوطى من التانية والعيان ساعتها يشوف صورتين فوق بعض .. زي ماقلت لكم .. لو فيه خطأ في التشخيص أو في العملية بتبقى فعلاً النتيجة كارثية

احمد يا جماعة دكتور صيدلي من ينبع من السعودية .. شاب مرح .. ضحوك .. وسيم .. دمه خفيف جداً تحس انك تعرفه من زمان .. أول ما دخل عندي العيادة افتكرته سعودي .. شكله .. تسرحيته .. لهجته .. دقنه .. لا والله سعودي ملوش حل .. واذا بيه يقول لي انه صيدلي مصري قاعد في ينبع من سنين طويلة .. والعكس برضه بشوفه ياجماعة .. كتير من السعوديين اللي عايشين في مصر يكلموني زي المصريين بالظبط .. لا .. وولاد بلد كمان .. ماعلينا

احمد عنده حول رأسي جامد قوي .. من زمان الدكاترة خوفوه .. قالوا له الحول ده غلز جداً .. والعملية لو ما اتعملتش صح .. الدنيا بتبوظ خالص .. هتتمنى انك مكنتش عملتها أصلاً .. وانتم بقى عارفين الدكاترة لما يبقوا عيانين .. بيبقوا قرأوا كل حاجة عن مرضهم والمشاكل اللي ممكن تحصل لهم من العملية .. الدكاترة يا جماعة اصعب عيانين ممكن نتعامل معاهم .. يعني حول نوعه صعب .. وتشخيصه صعب .. وعمليته صعبة .. وكمان العيان صعب .. انا محاصر يا جماعة ..

المهم .. احمد قال لي انه نازل مصر 10 ايام مخصوص عشان يعمل العملية ويرجع تاني .. قمت كشفت على احمد .. عملت له رسم عضلات .. فحص كده بنعمله بالكمبيوتر .. حددت العضلات المسئولة عن ارتفاع العين لفوق .. حددت زاوية ارتفاعها .. وحددت العملية اللي المفروض نعملها عشان ننزل العين لتحت .. احمد اثناء الكشف كرر جملة كذا مرة " انا واثق فيك يا دكتور جمال " .. خايف يا عيني ..  وانا كررت عليه كذا مرة " متخافشي يا احمد مش هيحصل لك أي ضرر من العملية .. ان شاء الله " .. اتفقنا نعمل العملية تاني يوم .. يا مسهل يارب

الناس الكبار عادة باعمل لهم عملية الحول ببنج موضعي .. بس الكلام ده مينفعش مع احمد .. ده قاعد يترعش وانا باكشف عليه .. طيب في العملية يا جماعة هيعمل ايه .. هما الدكاترة العيانين كده .. كلهم كده .. عاجنهم وخابزهم .. عيانين خوافين جداً .. " طيب يا احمد بكرة تصوم من الصبح عشان البنج هيكون بنج كلي "

تاني يوم الصبح .. احمد داخل أوضة العمليات .. دكتور التخدير بيسأله " طبعاً صايم يا احمد ؟ " .. " طبعاً يادكتور .. الصبح بس شربت سيجارتين " ..  يا سلام .. سجارتين بس .. دكتور التخدير قال لي يا دكتور جمال مينفعش ياخد بنج كلي .. لازم العملية تكون بنج موضعي .. قلت له مينفعش .. العيان مش بس خايف .. ده مرعوب .. هيتعبني وانا شغال .. دكتور التخدير قال لي هيفضل طول العملية جنبه ولو احتاجنا هيديله مهدئ ومش هيتحرك خالص .. قلت على بركة الله

العملية اخدت ييجي ساعة كده .. احمد كان على غير المتوقع .. كان هادي جدا جدا .. ومن غير مهدئ .. عملت له العملية من غير أي تعب .. الحمد لله .. ساعات يا جماعة الخوف بيعمل اكتر من كده

احمد جالي النهاردة عشان اطمن عليه بعد العملية عشان يرجع السعودية .. الحمد لله .. هايل والله .. نتيجة رائعة .. مفيش غلطة .. يستاهل الحمد .. قلت له عمليتك حلوة قوي .. عايز انزلها في حالة هذا الاسبوع .. قال لي بس تعمل كروب للصورة عشان وشي ما يبانش .. احترمت رغبته طبعا .. مع اني كان نفسي انزل الصورة كاملة لأنه شاب وسيم جداً وصورته كانت هتسمع في الصفحة عندي .. ولايكات وكده

حمد الله على سلامتك يا دكتور

ونشوف وشك بخير

د. جمـال صبحي