حالة هذا الأسبوع ( 329 ) .. حبيبة الحسيني .. 22 سنة .. من الأقصر

" عملت عمليتين حول قبل كده .. والحول رجع لي تاني "

حبيبة جت لي العيادة من شهر كده .. البنت كانت حزينة .. محبطة .. هي ومامتها قاعدين زعلانين جداً

·       خير يا حبيبة

·       انا عملت عمليتين حول قبل كده .. عملية قبل ما أخش المدرسة .. والعملية التانية وأنا في ثانوي .. وبرضه الحول رجع لي تاني

·       طيب وايه يعني يا بنتي .. لازم نعمل عملية تالتة .. يعني انتي ترضي تكملي حياتك كده

·       بس انا رحت لدكاترة كتير يا دكتور جمال وكلهم قالوا لي اوعى تعملي العملية تاني .. مادام عملتيها مرتين قبل كده والحول رجع .. يبقى كل أما تعمليها هيرجع تاني؟

العيانين يا جماعة اللي زي حبيبة اللي عملوا عمليتين حول قبل كده والحول رجعلهم تاني بيبقى صعب جداً أقنعهم انهم ممكن يعملوا عملية تالتة وان الحول هيتعدل .. كتير منهم مش بيصدقني

يعني ياجماعة نسيب بنت في السن دي تعيش عمرها كله كده عشان خايفين الحول يرجع تاني .. ده كلام .. طيب ماهو ممكن برضه مايرجعش تاني أبداً .. ازاي نضيع على ولادنا وبناتنا فرصة انهم يعيشوا حياة طبيعية وسط أصحابهم وزمايلهم .. وبعد كده مع زوجاتهم وأزواجهم عشان خايفين الحول يرجع تاني

قلت الكلام ده لمامة حبيبة .. اتشجعت .. وعملت لها العملية فعلاً

حبيبة جت من الأقصر النهاردة بعد شهر من العملية .. الحمد لله رب العالمين .. عمليتها حلوة قوي .. وان شاء الله تفضل حلوة كده على طول

حمد الله على سلامتك يا حبيبتي .. وشكراً يا ماما انك وافقتي أنزل صورة القمر دي على صفحتي