حالة هذا الاسبوع ( 238 ) ياسر عبد الرءوف .. 26 سنة .. من قنا

كل يوم اتسأل نفس السؤال :

" انا عندي حول وحشي في عيني .. بس العين الحولة ضعيفة جداً .. ينفع اعمل عملية الحول ؟ "

صحيح انا دايماً اقول ان الحول لازم يتعدل في سن صغيره .. وان الواحد ما يسيبش الحول لحد أما يكبر لأن العين الحوله بتضعف ولازم نعدل الحول عشان العين الحوله بتضعف وبيحصل فيها كسل وكده

لكن برضه .. لو حد معملش كده .. وبعدين فكر في أي وقت انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا لأ ؟.. طبعاً ينفع .. مفيش أي مشكلة .. ودايماً باقول للعيان .. حتى لو العين الحوله نظرها مش هيتحسن .. طيب اضعف الايمان نعدل الحول ويبقى شكلك عادي وطبيعي

ياسر شاب مؤدب زي السكر من قنا .. كان عندي في العيادة من اسبوعين بيسأل نفس السؤال اللي كل العيانين بيسألوه .. أنا عندي الحول ده من صغري .. وعيني دي نظرها ضعيف جداً يا دكتور جمال .. ينفع أعمل العملية ولا لأ .. طبعاً ينفع .. عملية الحول بتتعمل في أي سن .. وبتتعمل حتى لو العين ضعيفة جداً .. برضه مفيش أي مشكلة .. عملت العملية لياسر تاني يوم

الحمد لله رب العالمين

النهارده ياسر بعت لي الصور دي وطلب مني انزلها على صفحتي

ياسر بقى حاجة تانية خالص تخليني أصر على رأيي .. لأ ياجماعه .. محدش يوافق يكمل حياته أحول .. مهما كان عمرك .. مهما كان نظرك .. إوعى توافق تكمل كده .. شوف ياسر .. شوف شكله قبل العملية وشكله بعد العملية  

ياسرقالي بالحرف الواحد صحيح القرار كان متأخر بس مش مهم .. المهم إني اتشجعت وأخدت القرار

حمد الله على سلامتك يا ابني والف الف مبروك

د. جمال صبحي