حالة هذا الاسبوع ( 229 ) عبد الله خالد .. 23 سنة .. من المنيا

" الحول الوحشي للعين الضعيفة "

انا دايماً اقول ان الحول لازم يتعدل في سن صغيره .. وان الواحد ما يسيبش الحول لحد أما يكبر لأن العين الحوله بتضعف ولازم نعدل الحول عشان العين الحوله بتضعف وبيحصل فيها كسل وكده

لكن برضه .. لو حد معملش كده .. وبعدين فكر في أي وقت انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا لأ ؟.. طبعاً ينفع .. مفيش أي مشكلة .. ودايماً باقول للعيان .. حتى لو العين الحوله نظرها مش هيتحسن .. طيب اضعف الايمان نعدل الحول ويبقى شكلك عادي وطبيعي

عبد الله شاب مؤدب وزي السكر من المنيا .. كان عندي في العيادة بيسأل نفس السؤال اللي كل العيانين بيسألوه .. أنا عندي الحول ده من صغري .. ينفع أعمل العملية ولا لأ .. طبعاً ينفع .. عملية الحول بتتعمل في أي سن .. مفيش أي مشكلة

النهاردة عبد الله جالي بعد العملية بأسبوع .. عينيه لسه حمرا شوية لكن نتيجة العملية واضحة جداً .. عبد الله بقى حاجة تانية خالص تخليني أصر على رأيي .. لأ ياجماعه .. محدش يوافق يكمل حياته أحول .. مهما كان عمرك .. إوعى توافق تكمل كده .. شوف عبد الله.. شوف شكله قبل العملية وشكله بعد العملية

عبد الله قالي بالحرف الواحد صحيح القرار كان متأخر بس مش مهم .. المهم إني اتشجعت وأخدت القرار

وأخيراً ألف شكر يا عبد الله إنك وافقت أنزل صورتك على صفحتي

حمد الله على سلامتك يا ابني والف الف مبروك

د. جمال صبحي