حالة هذا الاسبوع ( 208 ) عبد الله عبد الصبور .. 41 سنة .. من السويس

يومياً افتح رسايل الصفحة ألاقي السؤال ده  :

·       انا عندي 58 سنة .. عندي حول .. ينفع اعمل عملية ؟

·       أنا عندي 40 سنة ينفع أعمل عملية الحول في السن دي ؟

·       أنا عندي 35 سنة وعايز أعمل عملية الحول .. تنفع ولا لأ ؟

الأول أحب اقول لكم ان مفيش حاجه إسمها مينفعش تعمل عملية الحول .. مفيش حاجه اسمها مينفعش .. مهما كان عمرك .. وكلمة مهما كان عمرك دي ملهاش حدود .. اربعين .. خمسين .. ستين .. برضه ينفع تعمل العملية وتعدل الحول

صحيح انا دايماً اكرر في كلامي ان الحول لازم يتعدل في سن صغيره .. وان الواحد ما يسيبش الحول لحد أما يكبر لأن العين الحوله بتضعف ولازم نعدل الحول قبل النظر ما يضعف .. الى آخر الكلام اللي با اكتبه كل يوم على صفحتي وكلكم خلاص حفظتوه

لكن برضه ياجماعه .. لو حد معملش كده .. وبعدين فكر في أي وقت انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا لأ ؟.. طبعاً ينفع .. مفيش أي مشكلة .. ودايماً باقول للعيان .. حتى لو العين الحوله نظرها مش هيتحسن .. طيب اضعف الايمان نعدل الحول ويبقى شكلك عادي وطبيعي

ده اللي حصل مع الأستاذ عبد الله بالظبط .. عبد الله راجل زي السكر شغال في سيراميكا كليوباترا في السويس .. كان عندي في العيادة بيسأل نفس السؤال .. أنا عندي الحول ده من صغري .. أنا دلوقتي عديت الأربعين .. ينفع أعمل العملية ولا لأ ..

النهاردة عبد الله جالي بعد العملية بيومين .. طبعاً عينيه لسه حمرا جداً لكن نتيجة العملية واضحة جداً ..  عبد الله بقى حاجة تانية خالص تخليني أصر على رأيي .. لأ ياجماعه .. محدش يوافق يكمل حياته أحول .. مهما كان عمرك .. إوعى توافق تكمل كده .. شوف عبد الله.. شوف شكله قبل العملية وشكله بعد العملية .. ولسه لما عينه الحمرا دي تروق وتفتح عادي زي العين التانيه بعد كام يوم كده .. هيبقى غير ..

عبد الله قالي بالحرف الواحد صحيح القرار كان متأخر بس مش مهم .. المهم إني اتشجعت وأخدت القرار

برافو والله يا عبد الله.. بالظبط زي المثل ما بيقول :

" أن تأتي متأخراً خيرٌ من ألا تأتي أبداً "

وأخيراً ألف شكر يا أستاذ عبد الله إنك وافقت أنزل صورتك على صفحتي

حمد الله على سلامتك يافندم والف الف مبروك