حالة هذا الأسبوع ( 207 ) احمد مصطفى ندا .. 31 سنة.. من برما - طنطا

" حسبة برما "

احمد يا جماعة أشطر صنايعي مبيض محارة وأسقف معلقة في محافظة الغربية كلها .. هو من قرية اسمها " برما " تابعة لطنطا .. ودي من أقدم وأعرق قرى محافظة الغربية .. من " برما " خرج الشيخ إبراهيم البرماوي ثاني شيوخ الجامع الأزهر الذي تولى المشيخة سنة 1690 يعني من 330 سنة .. ومن " برما " برضه خرج الشيخ راغب مصطفى غلوش أشهر المقرئين المصريين .. ومن البلد دي برضه طلعت الجملة المشهورة عند المصريين وهي جملة " حسبة برما " واللي بتحكي عن فلاحة من " برما "  كانت بتحسب عدد البيض اللي بتبيعه بمعادلات رياضية معقدة جداَ .. وعرفت برضه من الويكيبيديا ان احمد من أكبر عائلات الغربية المعروفة باسم عائلة " آل ندا "

- المقدمة دي كنت لازم أقولها عشان تقدروا تتصوروا شخصية احمد بطل حالتنا النهاردة -

احمد شاب زي السكر شخصية ورجولة وخفة دم فوق الوصف .. هو من فترة راسلني على الفيس وسألني أسئلة كتير عن عملية الحول

( ساعتها دخلت على البروفايل بتاع احمد عشان اشوف صورته واتعرف على الحول اللي عنده لقيته في كل صوره مع اصحابه يا إما باصص بالجنب عشان الحول ميبانش أو لابس نضارة سودا .. واضح ان الولد مضايق جداً من الحول )

المهم احمد أخيراً كان عندي في العيادة من شهرين تقريباً .. ( أنا عندي 31 سنة وعندي حول وحشي جامد أوي في عيني اليمين .. والعين دي مش بأشوف بيها خالص .. ينفع أعمل عملية والحول يتعدل ولا مينفعش عشان نظرها ضعيف )

( طبعاً الحول هيتعدل بالعملية يا احمد وشكلك هيبقى طبيعي تماماً لكن نظرها مش هيتحسن .. هتفضل ضعيفه زي ما هي )

( طيب بيقولوا مادام العين ضعيفة الحول لازم هيرجع تاني )

( لأ طبعاً مش صح .. الغالبية العظمى مش بيرجع لهم الحول أبداً .. اطمن يا احمد .. ان شاء الله ميرجعش )

( طيب يا دكتور جمال انا رحت لدكاترة قبل كده وقالوا لي ان العملية هتكون في العينين مش في العين الحوله بس .. انا طبعا خايف احسن يحصل حاجه في عيني السليمة .. دي عيني اللي باشوف بيها )

( درجة الحول عندك كبيرة أوي يا احمد .. لازم فعلاً العمليه تكون في العينين .. بس مفيش أي قلق .. عملية الحول مش بتكون في العين .. بتكون في العضلات اللي بتحرك العين .. يعني العين مش هيحصل لها أي حاجه من العملية )

المهم .. عملت لأحمد العملية تاني يوم .. الحمد لله نتيجتها هايلة .. فرقت في شكل الولد جداً .. بقى حاجه تانيه خالص

بس أكتر حاجه فرحتني بالعملية بتاعة احمد لما دخلت على بروفايله النهارده .. لقيت حاجه تانيه خالص .. صور تانيه خالص .. شياكة ايه .. صور سيلفي ايه .. وصور وسط اصحابه ايه .. باصص قدامه بابتسامة جميلة رقيقة وثقة في النفس واضحة جداً

أنا فعلاً بأكره مرض الحول ده جداً يا جماعة

الحمد لله رب العالمين وحمد الله على سلامتك يا ابني