حالة هذا الاسبوع ( 205 ) محمد عيد رزق .. 22 سنة .. من المحلة الكبرى

أحلى ابتسامة في الدنيا

" الحول الوحشي للعين الضعيفة "

فتحت رسايل صفحتي من شهر كده لقيت صورة شاب وسيم جداً عنده حول وحشي في عينه الشمال ..  دار بينا الحوار ده :

·       ازي حضرتك يا دكتور جمال .. انا محمد من المحلة .. عايزة اسألك على حالتي

·       تحت امرك يا محمد

·       انا عندي 22 سنة .. أنا عندي حول وحشي جامد أوي في عيني الشمال زي ما حضرتك شايف في الصورة .. الحول مخلي شكلي وحش قوي ..انا مش بأقدر أبص في وش حد وهو بيكلمني

·       من إمتى عندك الحول ده يا محمد ؟

·        الحول ظهر عندي وانا في ابتدائي .. الحول مأثر على نفسيتي جداً .. هو ممكن الحول بتاعي يتعدل فعلاً بعملية ؟

·       طبعاً يا ابني أي حول ممكن يتعدل بعملية فعلاً

·       طيب انا كشفت عندنا والدكاتره قالوا لي ان عيني الحوله نظرها ضعيف .. هي نظرها هيتحسن بعد العملية ؟

·       عمليات الحول مش بتحسن النظر يا محمد .. الحول هيتعدل بالعملية .. لكن النظر مش هيتحسن

·       طيب يا دكتور جمال الدكاتره قالوا لي برضه ان مادام العين ضعيفة .. فحتى لو عملت العملية فالحول لازم هيرجع تاني

·       لأ طبعاً .. الكلام ده مش صح .. فيه فعلاً حوالي 10% بس من الحالات بعد ما بنعدل الحول بيرجع تاني بعد خمس ست سنين كده .. لكن مش كل الناس كده .. الغالبية العظمى من الحالات مش بيرجع لهم الحول ويعيشوا طول عمرهم عينيهم معدوله .. وحتى الشوية القليلين اللي بيرجع لهم الحول بنعملهم عملية تاني والحول بيتعدل وبيكملوا حياتهم زي الفل

·       طيب انت رأيك ايه يا دكتور ؟

·       بص يا محمد .. انا متعاطف جداً مع الشباب اللي في سنك .. ودايماً اشجعهم يعملوا العملية .. مفيش حل تاني .. يعني ايه خايف الحول يرجع تاني .. توكل على الله يا ابني .. يعني انتي عايز تعيش طول عمرك بالحول ده ؟

المهم .. محمد جالي بعد يومين العيادة

·       انا خايف يحصل لعيني حاجة من العملية

·       عمليات الحول مش بتتعمل في العين .. بتتعمل في العضلات اللي بتحرك العين .. يعني لايمكن يحصل حاجة في عينك .. انا أصلاً مش هألمس عينك .. العين هتفضل زي ماهي .. مش ممكن تتأثر بالعملية

 عملت العملية لمحمد تاني يوم الصبح .. الكلام ده من اسبوعين كده .. محمد جالي تاني النهارده العيادة .. والله ماعرفته .. شكله بقى حاجة تانية خالص .. الحمد لله رب العالمين .. نتيجة العملية حلوة أوي .. أوي .. وكمان طلب مني انزل حالته على صفحتي عشان يشوفها كل المترددين اللي خايفين يعملوا العملية

ابتسامته الجميلة دي أكتر حاجه بتفرحني بعد العملية .. واحد تاني فعلاً .. ولسه لما عينه الحمرا دي تروق وتفتح عادي بعد اسبوع كده  هتبان أكتر وأكتر

حمد الله على سلامتك يا ابني .. يستاهل الحمد والله

د. جمــال صبـــحي