حالة هذا الاسبوع ( 138 ) اسامة .. 23 سنه من المحله الكبرى

" الحول وارتخاء الجفن "

حالة "اسامة" النهارده من الحالات اللي بنشوفها كتير .. العيان بيكون عنده حاجتين .. عنده عين فيها حول وفيها برضه ارتخاء في الجفن

طيب هو فيه علاقه بين مرض الحول ومرض ارتخاء الجفن ؟

في الحقيقه .. فيه علاقات بين المرضين مش علاقه واحده .. أولاً هما الاتنين بيجمعهم معنى واحد وهو ان الحول مرض في العضلات اللي بتحرك العين .. والارتخاء مرض في العضلات اللي بتحرك الجفن .. يعني ممكن العيان يكون عنده مرض في العضلات .. زي مثلاً مرض اسمه " الوهن العضلي" .. المرض ده لما ييجي في عضلات العين يعمل حول .. ولما ييجي في عضلات الجفن يعمل ارتخاء .. ولما ييجي في عضلات الجسم يعمل ضعف عام وهكذا

ثانياً .. فيه عضلات بتحرك العين بيكون ليها تأثير برضه على حركة الجفن .. زي مثلاً العضله اللي بترفع العين لفوق بتكون متصله مع العضله اللي بترفع الجفن لفوق .. يعني عضلة العين دي لما تمرض العيان يبقى عنده حول رأسي ويبقى عنده برضه ارتخاء في الجفن

ثالثاً .. من العلاقات المهمه بين الحول والارتخاء هو العصب التالت .. العصب التالت ياجماعه بيحرك 4 عضلات من اللي بتحرك العين وهو برضه اللي بيحرك عضلة الجفن ويفتح العين .. يعني لما العصب التالت بيمرض العيان بيبقى عنده حول وبرضه بيبقى عنده ارتخاء في الجفن

رابعاً .. فيه انواع كتير من الحول الشللي بيكون معاها برضه ارتخاء في الجفن .. زي شلل العصب التالت والرابع وشلل العضلات الرافعه وغيرها

بصراحه العلاقه بين الحول والارتخاء علاقه مركبه ومعقده .. ولازم العيان ده يتفحص بدقه شديده عشان نعرف نوع علاقة الحول بالارتخاء لأن ده بيحدد طريقة ونوع العلاج لأن كل نوع منهم له طريقة العلاج الخاصه بالنوع ده بالذات واللي متنفعش للانواع التانيه

طيب السؤال المهم هنا:

نعمل عملية الحول الأول ولا نعمل عملية ارتخاء الجفن الأول ولا نعمل العمليتين مع بعض ؟

الاجابه القاطعه : لازم نعمل عملية الحول الأول .. ليه ؟

لأن كتير لما بنعدل الحول للعيانين دول بنلاقي الارتخاء اتصلح شويه .. وساعات بنلاقيه اتصلح خالص لوحده من غير عمليه للجفن .. زي اللي حصل مع "اسامة" حالة هذا الاسبوع ..

وساعات برضه بنعمل عمليه ونعدل الحول ونلاقي الارتخاء زي ما هو مفيش تغيير

 يبقى لازم نقول للعيان ونفهمه ان احنا هنعمل عملية الحول الأول وبعد كده نحدد لسه فيه ارتخاء ولا لأ ومقداره أد ايه ومحتاج عمليه ولا لأ

  حمد الله على سلامتك يا اسامة .. والف مبروك

د. جمال صبحي