حالة هذا الأسبوع ( 119 ) آسر علي خليفه .. 4 سنين من القاهره

" شلل العصب الرابع "

العصب الرابع هو واحد من الأعصاب اللي بتحرك العين .. وشلل العصب الرابع هو نوع من انواع الحول الخلقي .. يعني " آسر " مولود كده .. لكن الأم مش بتعرف ان ابنها عنده المشكله دي الا بعد 6 شهور من الولاده .. ليه يا جماعه ..  لما البيبي يكبر ويعرف يقعد لوحده على الشهر السادس كده نلاقيه قاعد عاوج رقبته فالأم تاخد بالها ان فيه مشكله .. وتروح للدكاتره عشان تعرف ابنها عاوج رقبته ليه .. وبعدين تكتشف المفاجأه ان المشكله في العين مش في الرقبه

طيب هو ايه علاقة العين بالرقبه .. وليه شلل العصب الرابع بيخلي الطفل يعوج رقبته

الاطفال دول بتبقى عندهم العين اللي فيها الشلل أعلى من العين التانيه .. زي " آسر " كده ..  عينه الشمال طالعه لفوق وأعلى من العين اليمين .. طيب هو شايف ازاي كده  .. طبعاً شايف صورتين .. صورتين فوق بعض ..  لأن عنده عين أعلى من عين .. عشان كده " آسر " عايش وهو عاوج رقبته على طول عشان يخلي عينيه جنب بعض ويبطل يشوف الحاجه اتنين ..  تصوروا يا عيني كان بيجري وبيلعب وياكل ويتفرج على التليفزيون ويبص للموبايل وهو عاوج رقبته عشان ميشوفش الحاجه اتنين ..

شلل العصب الرابع علاجه عمليه في عضلات العين .. ملهوش علاج تاني .. وكل مانعمل العمليه بدري كل ما يكون احسن .. غلط اننا نسيب الطفل في السن دي شايف الحاجه اتنين .. مركز الاتحاد في المخ المسئول عن توحيد الصورتين بينمو في السن الصغيره دي .. وكمان عشان الطفل يعدل رقبته في سن صغيره قبل ميحصل تيبس في عضلات الرقبه

وطبعاً نتيجة العمليه بتبان فوراً .. يعني بمجرد ما الطفل يفوق من البنج بعد العمليه هيكتشف انه مش بيشوف الحاجه اتنين .. فنلاقيه باصص عادي ورقبته معدوله ونلاقي العينين اتعدلوا مفيش عين أعلى من عين

الف سلامه عليك يا ابني    

د. جمــال صبـــحي