حالة هذا الأسبوع ( 99 ) دينا  .. 3 سنين .. من ايتاي البارود .. البحيرة

النهاردة هاكلمكم ياجماعة عن حالة جديدة أول مره تشوفوها في حالة هذا الاسبوع

كتير من انواع الحول مش بتبان إلا لما العيان يبص للجنب .. العيان وهو باصص قدامه بيكون طبيعي خالص .. زي حالة دينا كده .. دينا وهي باصة قدامها شكلها بيكون عادي مفيش أي حاجة .. تيجي تبص للجنب نلاقي عينها طلعت لفوق وبقى شكلها غريب جداً

ايه سبب الحركة الغريبة دي ؟

سبب الحركة الغريبة دي هو ضعف في عضلات العين المائلة .. احنا قلنا قبل كده ان كل عين بيحركها 6 عضلات .. 4 عضلات مستقيمة وعضلتين مائلتين .. ساعات عضلة من الاتنين دول بتكون ضعيفة والعضلة التانية قوية .. فلما العيان يبص للجنب العضلة الأقوى تشد العين ناحيتها .. فيحصل المنظر العجيب ده اللي انتم شايفينه في صورة دينا قبل العملية

طيب السؤال هنا .. في حالة زي دي نسيب البنت كده مادام وهي باصة قدامها كويسه ومفيش حاجة .. ولا نعملها عملية

الاجابة بتاعتي قاطعة ومش بأغيرها .. طبعاً لازم نعملها عملية .. ازاي يعني نسيب بنت زي القمر كده كل أما تبص للجنب عينها تطلع لفوق ويبقى شكلها عجيب بالمنظر ده قدام الناس .. طيب هي تعيش إزاي كده ياجماعة .. تبطل يعني تبص يمين وشمال ولا تعمل ايه يعني .. لأ طبعاً لازم تعمل عملية ..

انا فهمت مامة دينا الموضوع .. وأقنعتها بأهمية العملية وإزاي ان البنت لازم يكون شكلها طبيعي وهي بتبص في أي اتجاه مش قدامها بس .. والعملية ناجحة ان شاء الله .. احنا هنقوي العضلة الضعيفة دي .. والمنظر الغريب ده مش هيظهر تاني أبداً بعد العملية

المهم .. عملية دينا الحمد لله كانت ممتازة والنتيجة كانت هايلة .. عينها بطلت تعمل كده خلاص

حمد الله على سلامتك يا دينا .. والف مبروك يا حبيبتي

د. جمــال صبـــحي