حالة هذا الأسبوع ( 93 ) مينا عماد حنين .. 6 سنين .. من سمالوط .. المنيا

" الرقبة المعووجة "

حالة الأسبوع ده من الحالات اللي بتصعب عليا قوي .. قصة أب وأم عاشوا مع ابنهم رحلة طويلة من العذاب والمعاناة والإحباط  

قصة أب وأم من الصعيد الجواني .. بعد سنة من الجواز خلفوا " مينا " .. ولي العهد .. وانتم عارفين بقى يعني ايه خلفة ولد عندنا في الصعيد .. حاجات كده بقى واغاني ايه .. وحفلات ايه .. واحتفالات وحكايات .. وافراح .. وليالي ملاح

المهم .. مينا لما وصل الشهر السادس .. عرف يقعد لوحده زي باقي الأطفال .. مامته وعماد " باباه " لاحظوا انه عاوج رقبته على طول ناحية اليمين .. يعدلوها بإيديهم .. يرجع يعوجها تاني .. يعدلوها .. يرجع يعوجها تاني .. الناس قالوا لهم يمكن مينا بينام على جنبه اليمين .. ابقوا خلوه ينام على جنبه الشمال .. رقبته هتتعدل .. مامته قعدت 6 شهور سهرانه جنبه طول الليل كل ما يتقلب ترجع تعدله عشان ينام على الجنب الشمال .. 6 شهور .. من غير أي فايدة .. أول مينا مايصحى من النوم يعوج رقبته فوراً ناحية اليمين

على سن سنة وشوية مينا عرف يقف لوحده ويمشي كمان .. بس فضل زي ماهو .. عاوج رقبته على طول ناحية اليمين.. يقف وهو عاوج رقبته .. يمشي وهو عاوج رقبته .. يبص للناس وهو عاوج رقبته .. يمسك لعبه وهو عاوج رقبته .. بياكل وهو عاوج رقبته .. وبرضه ناحية اليمين

مامته وباباه خدوه لدكاترة العظام وهو عنده حوالي سنتين .. كشفوا على رقبته .. عملوا اشعة على فقرات العنق .. عملوا اشعة مقطعية ورنين مغنناطيسي ورسم كهربي لعضلات الرقبة .. ومينا برضه عاوج رقبته ناحية اليمين

الدكاترة نصحوهم يعملوا علاج طبيعي على الرقبة .. مشوار طويل .. طويل جداً .. راحوا لمراكز الاشعة .. والرنين .. دخلوا مستشفيات و مستوصفات وعيادات .. عملوا جلسات تمارين للرقبة .. عملوا جلسات موجات صوتية على الرقبة .. قعدوا اكتر من سنتين يلفوا على مراكز العلاج الطبيعي .. جلسات تمارين واشعة .. ومينا عاوج رقبته ناحية اليمين .. إلى أن حدثت مفاجأة من العيار الثقيل

من اسبوعين كده نزلت على صفحتي حالة هذا الاسبوع بتاعة الطفل محمد ايمن عن الحول الدوراني والرقبة المعووجة .. مامة مينا كانت قاعدة على النت بتدور زي كل يوم عن علاج الرقبة المعووجة .. وقعت عينها على صفحتي .. قعدت تقرأ باستغراب شديد .. أول مرة من 6 سنين مامة مينا تعرف ان عوجة الرقبة ليها علاقة بالعين .. معقولة الكلام ده .. محدش قال لها كده أبداً .. 6 سنين ياعيني دايخة بابنها .. محدش قال لها أبداً اكشفي عيون

مامة مينا بعتت لي رسالة .. حكت لي قصتها الطويلة الحزينة مع ابنها .. بعتت لي صورته .. عاوج رقبته فعلاً

" مينا دلوقتي في سنة أولى .. بيبص على السبورة وهو كده ..  بيحل الواجب وهو كده .. انا تعبت يا دكتور جمال .. انا عملت كل حاجة .. معقولة اللي انا شفته ده على صفحتك .. ممكن مينا يكون عنده حول دوراني زي انت ما بتقول ؟ "  

لازم اشوفه الأول يا مدام .. عوجة الرقبة اسبابها كتير .. ممكن تكون من عينيه فعلاً .. وممكن لأ .. لازم اكشف عليه الأول

يومين بالظبط و مينا كان عندي في العيادة .. أب وأم في منتهى الحزن والهم والغم .. دقائق الكشف مرت في صمت رهيب .. عماد ومراته مستنيين ه اقول ايه

المهم مينا طلع عنده شلل في العصب الرابع  .. حاجة كده شبه الحول الدوراني بالظبط .. والطفل برضه مش بيعرف يبص الا لما يعوج رقبته

بصيت للأب والأم " من عينيه يا افندم .. فعلاً من عينيه .. مينا عنده شلل في العصب الرابع رقبته معووجة من عينيه .. مينا علاجه عملية "

" ورقبته هتتعدل بعد العملية يا دكتور جمال ؟ "

" ان شاء الله .. رقبته ه تتعدل بعد العملية على طول .. على طول يعني على طول .. يعني هيخرج من أوضة العمليات عادل رقبته "

 استأذنت مامة مينا اني أصوره قبل العملية ورقبته معووجة

تاني يوم عملت العملية لمينا في عينه الشمال .. الحمد لله العملية مشيت زي الفل .. كان يوم خميس .. يوم السبت مينا جالي العيادة .. حاجة وصفها صعب يا جماعة .. أحلى ابتسامة من أحلى أب وأحلى أم وأحلى طفل .. مينا عادل رقبته لأول مرة من 6 سنين .. مامة مينا أصرت تصورني معاه وطلبت مني انزل ابنها على صفحتي في حالة هذا الأسبوع .. انقل لكم كلامها بالحرف الواحد:

 " لازم كل أم تلاقي ابنها رقبته معووجة تشوف مينا وتقرأ قصته .. مش عايزه أي أم تشوف اللي انا شفته .. الحمد لله يا دكتور جمال .. ربنا يشفي الجميع "  

د. جمــال صبـــحي