حالة هذا الاسبوع ( 62 ) الطفل هشام فايز  8 سنوات .. من قنا

اعوجاج الرقبة وشلل العصب الرابع

شلل العصب الرابع ياجماعة غالباً بيكون عيب خلقي .. يعني الولد ده اتولد كده .. الاطفال اللي عندهم شلل في العصب الرابع بنلاقي عندهم عين اعلى من عين حاجة بسيطة قوي .. مش باينة يعني .. لكن تأثيرها بيكون كبير جداً .. الطفل ياعيني اللي عينه كده بيشوف صورتين فوق بعض .. والحل الوحيد عشان يشوف صورة واحدة انه يعوج رقبته كده عشان ينزل العين العالية شوية ويقربها من العين التانية .. تخيلوا طفل زي ده يفضل طول حياته عامل كده .. بيمشي وهو عاوج رقبته .. بيذاكر وهو عاوج رقبته .. بياكل وهو عاوج رقبته .. بيبص للموبايل وهو عاوج رقبته .. باباه ومامته كل شوية يزعقوا له .. اعدل رقبتك يا ولد .. فاكرينه بيدلع .. وساعات يضربوه عشان يعدلها .. يقوم يعدلها شوية عشان يريحهم وبعدين يرجع يعوجها تاني عشان يشوف صورة واحدة مش صورتين ..

في عملية شلل العصب الرابع احنا بننزل العين العالية لتحت جنب العين التانية .. ونتيجة العملية بتظهر بعد العملية على طول .. انا شخصياً بأستنى جنب الولاد دول بعد العملية لحد أما يفوقوا من البنج ويقدروا يقعدوا عشان اشوفهم عدلوا رقبتهم والعملية نجحت ولا لأ .. الحمد لله هشام بعد العملية بساعة تقريباً رحت أوضته أطمن عليه .. لقيته قاعد على السرير زي القمر كده ورقبته معدوله زي مانتم شايفين .. اديته بوسة من هنا ومن هنا وقلت له حمد الله على سلامتك ياحبيبي والف مبروك على نجاح عمليتك

د. جمــال صبحي