حالة هذا الاسبوع ( 57 ) بلال احمد عبد الستار 3 سنوات .. من السويس

بافتح رسايل الفيس زي كل يوم .. لقيت صورة لطفل أمور جداً .. بس بيبص بالجنب زي مانتم شايفين كده .. وتحت الصورة رسالة من مامته قصيرة وواضحة جدا

" ابني بلال بيبص بالجنب يا دكتور جمال "

تخصص الجهاز الحركي للعين يا جماعة تخصص دقيق جداً .. مش حول بس زي ماكل الناس فاكرة .. امراض الجهاز الحركي للعين كتيرة جداً .. يعني مش لازم ياجماعة يكون الطفل عنده حول عشان يروح يكشف عند دكتور متخصص في الحول .. الحول ده مجرد مرض من الامراض الكتيرة اللي بنعالجها

انا حكيت لكم قبل كده عن عوجة الرقبة عند الاطفال وعلاقتها بالعين .. حالة النهاردة حاجة شبه كده .. الحالة دي من الحاجات اللي بنشوفها كتير وبنتسأل عليها دايماً .. الولد بيبص بالجنب نكشف عند تخصص ايه يا دكتور ؟ ..

طيب عايزين الأول نعرف ايه الاسباب اللي تخلي طفل زي بلال يبص بالجنب

·       اول سبب ان يكون بلال بيستعبط

·       تاني سبب ان يكون رقبته بتوجعه

·       تالت سبب ان يكون عند استيجماتيزم ومحتاج نظارة

·       رابع سبب انه يكون عنده حاجة في الأذن

·       خامس سبب وده بقى صميم تخصصي .. انه يكون عنده احد امراض الجهاز الحركي للعين اللي بتخلي الطفل يبص بالجنب كده .. ودي أمراض كتيرة جداً يا جماعة مش مجال حصرها دلوقتي .. بلال لقيت عنده السبب الخامس

اللي عايز اقوله ولازم تفهموه كويس ان بلال لما بيبص بالجنب كده بيشوف أحسن بكتير لو بص طبيعي لقدام .. عشان كده بلال باصص كده على طول .. مامته تزعق له .. باباه يضربه .. مفيش فايدة .. برضه بيبص بالجنب .. وبغض النظر عن نوع المرض اللي خلاه كده .. فالهدف من العملية عشان يبطل يبص كده .. ان الحتة الحلوة اللي في الجنب دي اللي هو بيحبها وقاعد يبص لها على طول .. نحط له الحتة دي قدامه ..

وطبعاً دي عملية ضرورية جداً ولابد من عملها .. طيب بلال دلوقتي بيتفرج على التليفزيون وهو باصص بالجنب كده .. وبيلعب مع صحابه وهو باصص لهم بالجنب كده .. طيب السنة الجاية بلال هيخش المدرسة .. تخيلوا كده معايا .. هيبص للسبورة ازاي؟ .. هيحل الواجب في كراسته ازاي؟ .. المهم

بلال يا مدام محتاج عملية ضروري عشان يعرف يبص قدام زينا .. مفيش حل تاني ..   

" يعني بعد العملية بلال هيبص قدامه عادي يا دكتور جمال ؟ "

" ان شاء الله يا فندم "

الحمد لله رب العالمين .. بلال عمل العملية وسافر السويس .. جالي النهاردة استشارة .. بصراحة حاجة تفرح ..  بطل يبص لي بالجنب خلاص .. بقى عادي والله زي بقية الاطفال

الف مبروك يافندم وربنا يخليه لك

د. جمـال صبحي