حالة هذا الأسبوع ( 33 ) : عبد الرحمن ... سنتين .. من المحلة الكبرى

" نصف الوجه الممتلئ "

النهاردة يا جماعة هأقول معلومة مهمة للأمهات هيستغربوا منها جداً ..معلومة مالهاش تفسير ..  انا نفسي باستغرب منها:

عارفين طبعاً كلنا ان العصب الرابع مالوش اي علاقة بالوجه  .. العصب الرابع مهمته ان هو اللي بيحرك العين لتحت ..تمام ؟؟

الاطفال الصغيرين المولودين وعندهم شلل في العصب الرابع دايماً .. لما نبص في وشهم .. بنلاقي نص وش مليان – سمين .. تخين يعني – ونص الوش التاني بنلاقيه رفيع .. والأغرب ياجماعة ان النص التخين بيكون في نفس الناحية اللي فيها العصب المشلول .. يعني عبد الرحمن أول ماتبص في وشه هتلاحظ ان نص وشه اليمين أتخن من نص وشه الشمال .. احنا بقى اول مانشوف طفل زي عبد الرحمن كده .. بنقول على طول : الولد ده عنده شلل في العصب الرابع بتاع العين اليمين .. 

الولاد دول ياجماعة بتبقى عندهم العين اللي فيها الشلل أعلى من العين التانية .. زي عبد الرحمن كده .. تلاقي عينه اليمين طالعة لفوق قوي عن العين الشمال .. انا دايماً اقول للأمهات طبعاً شكل الطفل حاجة مهمة جداً ولازم  نخلي شكل عينه طبيعي .. لكن والله مش هو ده الموضوع .. صحيح الشكل حاجة مهمة ولازم نصلحها .. لكن الأهم يا جماعة الوظيفة .. تصوروا عبد الرحمن كده وهو عنده عين أعلى من عين .. شايف الصورة اتنين .. صورة بالعين اليمين عالية شوية وصورة تانية بالعين الشمال .. عشان كدة الولاد اللي عندهم شلل العصب الرابع نلاقيهم قبل العملية عاوجين رقبتهم عشان يشوفوا الصورة واحدة مش اتنين .. شوفوا بعد اسبوع من العملية عبد الرحمن عينيه اتعدلت ازاي الحمد لله وبقوا قصاد بعض عادي زي بقية الولاد .. وكمان عبد الرحمن ياجماعة عدل رقبته وبقى يبص عادي خالص

بس فاضل حاجة واحدة فضلت زي ما هي:

" نصف الوجه الممتلئ "

لسه عبد الرحمن عنده نص وشه اليمين اتخن من نص وشه الشمال .. هي صحيح مش باينة قوي .. لكن احنا عشان دكاترة حول وعارفين الظاهرة الغريبة دي بناخد بالنا منها  ..  الحمد لله .. 

.. بصراحة عمليتك هايلة ياعبده ...

حمد الله على سلامتك ... وألف مبروك

د. جمــال صبـــحي