حالة هذا الأسبوع  " أ. ص. زاخر " 32 سنة .. من  المنيا .. برضه صعيدي

الحول الانسي مع ارتخاء الجفن العلوي

عيادتي اليومين دول نصها صعايدة .. مش عارف ليه .. من أول بني سويف ونازل ...

" أ. ص. زاخر " جالي من المنيا من اسبوع كده .. راجل صعيدي قبطي عشرة على عشرة .. شهامة واخلاق ورجولة .. حاجة كده من بتاعة زمان .. مش موجود منها دلوقتي

دخل في الموضوع على طول " انا يا دكتور جمال من صغري عيني اليمين داخلة لجوة والجفن ساقط لتحت مخلي العين ضيقة .. مع الحول كمان شكلي بقى وحش قوي .. هو صحيح يا دكتور لازم اعمل عملية للحول وعملية تانية لرفع الجفن زي ما قالوا لي "

لما كشفت عليه لقيت عنده نوعين من الحول داخلين في بعض .. الحول الانسي الداخلي اللي باين في العين اليمين .. وحول تاني ناتج من ضعف العصب الرابع في العين الشمال وده اللي مخلي العين اليمين أوطى شوية من الشمال .. العين لما تبقى واطية كده الجفن يسقط لتحت والعين تبقى ضيقة ..

قلت له يا استاذ " الحول الانسي امره سهل جداً وده حنعدله من العين اليمين لكن ارتخاء الجفن ده سببه العين الشمال .. عشان فيها ضعف في العصب الرابع هو اللي مخلي الجفن ساقط كده "

الولد استغرب على الآخر "  يعني يا دكتور - طبعاً بالصعيدي – حتجول انك حتعمل عضلة في العين الشمال عشان الجفن اليمين يطلع لفوج ويبقى زين.. ايش الخيال يا ناس "

" أ. ص. زاخر " كان واثق فيا ثقة عمياء ووافق يعمل العملية على طول .. الحمد لله رب العالمين .. ثقته كانت في محلها .. التشخيص كان صحيح 100% والقرار اللي اخدته كان صحيح 100%

النهاردة جالي بعد ماعمل العملية .. والله نتيجة هايلة يا زاخر .. حاجة كده ولا في الاحلام  .. بسم الله ما شاء الله ..

طلبت منه اعرض صورته في حالة هذا الاسبوع .. وافق على طول بس طلب اني اخبي نص وشه عشان محدش يعرفه .. شكراً يا زاخر

والله انا واثق يابني ان اللي حيشوفك بعد العملية مش ممكن يعرفك .. بقيت حاجة تانية خالص

حمد الله على السلامة والف مبروك

د. جمــال صبحــي