حالة هذا الأسبوع ( 125 ) سهيله  .. 10 سنين .. من المنوفيه

فيه حول مش بيبان إلا لما العيان يبص للجنب .. يعني العيان وهو باصص قدامه بيكون طبيعي خالص .. زي حالة سهيله كده .. سهيله وهي باصه قدامها شكلها بيكون عادي خالص مفيش أي حول .. لكن لما تيجي تبص للجنب نلاقي عينها طلعت لفوق وبقى شكلها غريب جداً

طيب ايه سبب الحركة الغريبه دي ؟

سبب الحركه الغريبه دي هو ضعف في عضلات العين المائله .. احنا قلنا قبل كده ان كل عين بيحركها 6 عضلات .. 4 عضلات مستقيمه وعضلتين مائلتين .. ساعات عضله من العضلات المائله بتكون ضعيفه .. فلما العيان يبص للجنب نلاقي العين طلعت لفوق .. فيحصل المنظر العجيب ده اللي انتم شايفينه في صورة سهيله قبل العمليه

طيب السؤال هنا .. في حالة زي دي نسيب البنت كده مادام وهي باصه قدامها كويسه ومفيش حول .. ولا نعملها عمليه ؟

الاجابة بتاعتي قاطعه ومش بأغيرها .. طبعاً لازم نعملها عمليه .. ازاي يعني نسيب بنت زي القمر كده كل أما تبص للجنب عينها تطلع لفوق ويبقى شكلها عجيب بالمنظر ده قدام الناس .. طيب هي تعيش إزاي كده ياجماعه .. تبطل يعني تبص يمين وشمال ولا تعمل ايه يعني .. لأ طبعاً لازم تعمل عمليه ..

انا فهمت مامة سهيله الموضوع .. وأقنعتها بأهمية العملية وإزاي ان البنت لازم يكون شكلها طبيعي وهي بتبص في أي اتجاه مش قدامها بس .. والعملية ناجحه ان شاء الله .. احنا هنقوي العضله الضعيفة دي .. والمنظر الغريب ده مش هيظهر تاني أبداً بعد العمليه

المهم .. عملية سهيله الحمد لله كانت ممتازة والنتيجة كانت هايله .. عينها بطلت تعمل كده خلاص

حمد الله على سلامتك يا سهيله .. والف مبروك .. بصي يمين وشمال زي مانتي عايزه .. خلاص مابقاش فيه مشكله يا حبيبتي  

د. جمــال صبـــحي