حالة هذا الأسبوع ( 150 ) محمد الكعبي البصراوي .. 30 سنة .. من العراق

" الحول الوحشي المرتجع "

من فتره طويله محمد بعتلي رساله على الماسنجر ده نصها :

صباح الخير دكتور .. انا محمد من العراق .. سويت عمليتين حول قبل كده من 5 سنين سويتها في العراق ومن 3 سنين سويتها في تركيا .. ونفس النتيجه .. بعد العمليه بشهرين الحول يعود كما كان .. هذه صورتي الآن .. هل لو أتيت لك في مصر لعمل عمليه ثالثه .. هل سيعود الحول مرة أخرى ؟ ارجوك جاوبني بصراحه يا دكتور 

طيب .. انا صعب جداً اني اقنع عيان عمل عمليتين حول قبل كده والحول رجع له تاني انه يعمل عملية تالته .. العيان بيكون محبط ويائس .. وبيكون عنده سؤال واحد :

" وأنا أضمن منين لوعملت عملية تالته ان الحول مش هيرجع تاني ؟ "

طبعاً سؤال مشروع وحقه إنه يسأله

طيب .. رديت على محمد نفس الرد اللي باكتبه للناس اللي عندهم حول مرتجع وخايفين يعملوا عمليه تاني :

كتب الطب والاحصاءات في مراكز ومستشفيات الحول في العالم كله بتقول الآتي :

1. انواع الحول كتيره جداً .. ييجي 80 نوع

2. بعد عمليات الحول الناجحه .. الغالبيه العظمى من انواع الحول مش بيرجع لها الحول ابداً بعد العمليه .. يعني اللي عنده حول من الانواع دي وعمل عمليه حلوه والحول اتعدل .. يستحيل الحول يرجع له تاني ويعيش زي مايعيش ويكمل حياته وهو زي الفل

2. انواع الحول التانيه اللي ممكن الحول يرجع لها تاني بعد العمليه مش كتيره .. ولازم الدكتور يقول للعيان النسبه المئويه لرجوع الحول حسب نوع الحول اللي عند العيان .. فيه حول بيرجع بنسبة 1% بس .. وفيه حول بيرجع بنسبة 10% .. ودي اكبر نسبه معروفه للحول المرتجع

3. نسبة الرجوع 10% يعني ايه ؟ .. يعني كل 100 عيان عندهم الحول ده ونعمل لهم العمليه والحول يتعدل .. 90 عيان ميرجعش الحول عندهم ابداً .. و10 عيانين بس هما اللي بيرجع لهم الحول .. وده بنسميه الحول المرتجع .. وال 10% دول هما اللي كل اسبوع يخشوا صفحتي ويخوفوا الناس من العمليه ويقولوا للناس اوعوا تصدقوا الكلام ده .. اوعوا تعملوا العمليه .. احنا عملنا العمليه والحول رجع تاني

5. طيب اللي طلع حظه وحش وكان من ال 10% دول والحول رجع له .. يعمل ايه .. يعمل حاجه من اتنين .. يا اما يقعد في البيت زعلان ومحبط ويائس ومكسوف ويدخل كل اسبوع على صفحتي يحذر الناس من العمليه .. يا اما يكون ذكي وشجاع وميرضاش يكمل حياته كده ويصر يعمل عمليه تاني عشان يعدل الحول

6. طيب اللي عنده حول مرتجع وعمل عمليه تاني هل ممكن الحول يرجع له تاني بعد فتره ؟ .. آه ممكن .. برضه بنسبة 10% .. يعني كل 10 عيانين عندهم حول مرتجع 9 منهم الحول يتعدل وميرجعش تاني ابدا وعيان واحد يرجع له الحول .. والعيان ده يا اما يخش صفحتي تاني يسب ويلعن في عمليات الحول .. يا اما يعمل عمليه تالته .. وهكذا

كتبت الرد ده لمحمد

عادة بعد الرد ده ينقسم العيانين لنوعين لا ثالث لهما

النوع الأول بيكون رده كده :

( طيب وانا اضمن منين ان الحول مش هيرجع تاني ..  ما يمكن اكون انا من ال ١٠% دول اللي الحول بيرجع لهم ..  لأ أنا مش ه اعمل العمليه )

النوع التاني بيكون رده كده :

( نتوكل على الله ونعمل العمليه وان شاء الله أكون من ال ٩٠ % اللي الحول مش بيرجع لهم )

محمد الكعبي كان من النوع التاني

جالي مصر .. وعملتله العمليه .. دي صورته عندي في العياده بعد العمليه باسبوعين .. الحمد لله العمليه حلوه أوي ..

بعد 3 شهور محمد بعتلي على الماسنجر صوره تانيه .. الحمد لله .. عينه برضه حلوه أوي .. مفيش حول خالص

الحمد لله رب العالمين .. الحول مارجعش ..

القصه دي قديمه .. محمد اخباره انقطعت .. ودي عندي معناها انه الحمد لله كويس والحول مرجعش .. وان شاء الله ميرجعش تاني أبداً

د. جمــال صبـــحي