|
حالة هذا الأسبوع ( 121 ) اسلام فتوح كيلاني .. 22
سنه .. من المحله الكبرى
" من فضلك يا دكتور جمال انا عملت عمليتين قبل كده
والحول برضه زي ما هو "
قبل ما اكلمكم عن قصة النهارده احب أولاً اشكر
اسلام على شجاعته الفائقه وثقته بنفسه اللي ملهاش حدود
وموافقته اني انزل صورته على صفحتي في حالة هذا الأسبوع
نخش بقى في الموضوع
لما عيان يكون عمل عمليتين حول قبل كده والحول
متعدلش بيكون
صعب عليا جداً اني اقنعه يعمل عملية تالته وان ممكن عينه
تتعدل .. كتير منهم مش بيصدقني .. صحيح ان عمليه في العين
للمرة التالته بتكون حاجه صعبة جداً ... العضلات بتكون
متليفه وكل الانسجه ملزقه في بعضها والحسابات قبل العمليه
دايماً بتتلخبط لما نفتح ونشوف عضلات العين على الطبيعه
... اسلام كان متابع حالاتي على الصفحه
..
انا دايماً باقول مفيش حاجه ملهاش حل .. كل مشكله وليها حل
باذن الله .. مينفعش شاب في سن اسلام ولسه الدنيا قدامه
يرضى انه يعيش حياته أحول .. مفيش أي مبرر لكده .. حتى لو
عمل عمليتين قبل كده وفشلوا .. ده برضه مش مبرر انه يرضى
يعيش كده .. لازم يكون مناضل .. بطل .. لازم يعمل عمليه
تالته ورابعه وخامسه لو لزم الأمر .. لازم عينه تتعدل
اسلام كان لحسن حظي من النوع ده .. ولد شجاع جداً
ومش راضي أبداً عن شكله .. لم يستسلم زي كتير من المرضى ..
كتير رفعوا الرايه البيضا بعد اول تجربه فاشله .. وكملوا
حياتهم محبطين ومكسوفين .. لكن اسلام لأ ..
عمل عمليتين فاشلين قبل كده وأهو
جاي لي النهارده عايز يعمل عمليه كمان ..
سؤاله كان محدد وواضح " د. جمال انت دايماً بتكتب
ان أي حول مهما كان ممكن يتعدل .. صح ؟ "
" صح يا اسلام انا باكتب كده .. لكن لما يكون
العيان عامل عمليتين قبل كده زيك كده بتكون الحسابات صعبه
جداً والنتائج ساعات بتكون مش دقيقه .. مش زي العيان اللي
معملش عمليات قبل كده .. بتكون الحسابات سهله .. والنتائج
دايماً بتكون زي توقعاتنا "
" تقصد ايه يا دكتور جمال ؟ "
" اقول لك بصراحه يا اسلام .. الحول اللي عندك ده
هاعدله يعني هاعدله باذن الله طبعاً .. لكن لازم توافق اني
ممكن احتاج عمليتين عشان اعدله .. مش شرط .. بس ده احتمال
لازم توافق عليه وبصدر رحب .. احتمال بعد العمليه الاولى
يفضل زاويه صغيره تحتاج تظبيط تاني .. زي ما قلت لك
النتائج ساعات بتكون غير المتوقع .. بتفرق من عيان للتاني
.. حالة العضلات .. العمليات السابقه .. الانسجه المحيطه
... موافق ؟ "
" موافق طبعاً يا دكتور .. على بركة الله "
عملت لاسلام العمليه .. كانت صعبه والله .. وطويله
..
بس الحمد لله مشيت كويس .. بعد
العمليه اسلام كان أحسن بكتير .. بس مش عشره على عشره ..
انا مش بارضى بكده أبداً .. انا باحب عشره على عشره .. مش
تسعه على عشره .. اديت ميعاد لاسلام تاني وعملتله عمليه
تانيه بس بسيطه جداً مش زي العمليه الأولى .. يعني حاجه
بتاعة ربع ساعه كده .. عشان الزاويه الصغيره دي
دي صورة اسلام بعد العمليه التانيه بتاعتي ..
الحمد لله .. مفيش حول خلاص .. الحمد لله رب العالمين ..
شاب زي الفل .. لأ وإيه .. تسريحه بقى وكده .. وكمان دقن
تركي .. ربنا يسعدك يا ابني
حمد الله على سلامتك يا بطل
والف مبروك
د. جمال صبحي
|
.jpg)
