حالة هذا الاسبوع ( 102 ) محمد السيد جاد 20 سنة .. طالب بهندسة المنصورة قسم مدني

الأول شكراً يا بشمهندس محمد انك طلبت مني اني انزل صورتك في حالة هذا الاسبوع لما بعتلي رسالة بعد العملية بتقول فيها بالحرف الواحد ( حضرتك يادكتور لو عاوز تنزل صورتي نزلها عادي علشان لو فيه حاله زيي وخايفه تعمل العملية تاخد خطوة شجاعة وتعملها )

" الحول الوحشي للعين الضعيفة "

فتحت رسايل صفحتي من اسبوعين كده لقيت صورة شاب صغير عنده حول جامد أوي ..  في الحقيقة يا جماعة المنظر ده بيستفزني جداً .. ازاي يعني ولد في أجمل سنين حياته يعيش كده .. احلى ايام عمره يعيشها بالمنظر ده .. ازاي .. انا مش عارف اجابه والله .. انا مش باتكلم عن محمد بالذات .. انا قصدي الحالات دي في السن دي .. باشوفها كتير أوي وباستغرب أكتر .. صبيان وبنات ..  ازاي يعني ولد ولا بنت في الجامعة في وسط زمايلهم قاعدين كده .. طيب هما عايشين كده ليه .. راضيين بكده ليه .. الولاد دول لما باسألهم سايب نفسك كده ليه يابني ولا يا بنتي .. معملتش عملية ليه عشان تعدل الحول ..  باسمع منهم اجابات عجيبة وغريبة واحياناً اجابات عبيطة .. الاجابات دي بتستفزني جداً .. حاربت طول عمري عشان اقضي عليها معرفتش .. انا هاقول لكم معظم الاجابات العجيبة دي:

·       الناس كلهم بيقولوا اوعى حد يلعب في عينك

·       اصلي سمعت اني لو عملت العملية الحول هيرجع تاني

·       دي خلقة ربنا .. محدش يغير خلقة رينا

·       انا خايف ومرعوب لو عملت العملية عيني تبوظ

·       الدكاترة قالوا لي مادام العين ضعيفة يبقى عملية الحول مش هتنجح

·       بيقولوا مادام وصلت 20 سنة يبقى خلاص مينفعش عمليه

·       أصل انا عملت عملية قبل كده وفشلت يبقى خلاص مفيش فايده 

ما علينا .. نرجع لحالة محمد  .. بعد ما شفت الصوره اللي محمد بعتها وفيها الحول ده .. دار بينا الحوار القصير المحدد التالي :

·       ازي حضرتك يا دكتور جمال .. انا محمد طالب في كلية الهندسة .. عايز اسألك على حالتي

·       تحت امرك يا محمد

·       انا عندي حول وحشي جامد أوي في عيني زي ما حضرتك شايف في الصوره .. الحول مخلي شكلي وحش قوي ..انا مش بأقدر أبص في وش زمايلي وهما بيكلموني

·       من إمتى الحول ده ؟

·        من صغري .. انا عملت عملية قبل كده بس فشلت .. انا كشفت والدكاتره كلهم  قالوا لي ان عيني الحوله نظرها ضعيف جداً.. وعشان كده كل أما تعمل عملية هتفشل

·       لأ طبعاً .. الكلام ده مش صح .. هتعمل العملية وهتنجح ان شاء الله

·       طيب نسبة نجاح العملية كام في المية ؟

·       100 %

·       طيب ممكن ترجع بنسبة كام في المية ؟

·       10 %

·       طيب واذا رجعت بترجع امتى

·       بعد خمس سنين تقريباً

·       طيب واذا رجعت ؟

·       تعمل عملية تاني وتعدلها تاني

·       طيب انا العملية هتعطلني كام يوم .. انا طالب والدراسة بدأت

·       بالكتير اربعة أو خمس أيام

·       طيب انا عايز اعملها بكرة .. ممكن ؟

·       ان شاء الله

عملت العملية لمحمد .. الحمد لله رب العالمين .. نتيجة العملية حلوة أوي .. أوي

حمد الله على سلامتك يا ابني .. يستاهل الحمد والله .. وان شاء الله الحول ميرجعشي تاني ابداً

د. جمــال صبـــحي