حالة هذا الأسبوع ( 90 ) أسامة قائد .. 26 سنة .. من السعودية

" الحول المرتجع "

صعب جداً اني اقنع عيان عمل عمليتين حول قبل كده والحول رجع له تاني انه يعمل عملية تالتة .. العيان بيكون محبط ويائس .. وبيكون عنده سؤال واحد :

" وأنا أضمن منين لوعملت عملية تالتة ان الحول مش هيرجع تاني ؟ "

طبعاً سؤال مشروع وحقه إنه يسأله

طيب .. قبل ما أرد على السؤال ده لازم تعرفوا ان اسامة مش حالة الاسبوع ده .. اسامة كان عمل زمان عمليتين حول قبل كده .. وانا عملت له العملية التالتة في يناير 2012 .. ودي صورته قبل العملية بتاعتي وبعد العملية

دلوقتي هأقول لكم ملخص موضوع الحول المرتجع بمنتهى الصراحة

 بعد عمليات الحول الناجحة نسبة رجوع الحول تاني زي ما بتقول الكتب حوالي 10 % ... ودي مش نسبة عالية .. يعني كل 10 عيانين يعملوا العملية 9 منهم الحول مايرجعش لهم أبداً طول عمرهم .. وعيان واحد من العشرة بيرجع له الحول .. رجع ليه .. وعشان ايه .. وايه السبب .. وليه العيان ده بالذات .. والله ما نعرف .. هي النسبة كده

 المهم .. العيان ده اللي الحول رجع له تاني .. الحول رجع له بعد كام سنة ؟

والله فيه اللي بيرجع له الحول بعد العملية بسنة أو سنتين وفيه اللي بيرجع له الحول  بعد  العملية بعشر سنين ..  برضه ليه ده رجع له الحول بعد سنة ولا سنتين وده رجع له بعد 10 سنين .. برضه منعرفش .. هي النسبة في الكتب كده

طيب لو الحول رجع بنعمل ايه ؟ .. والله الاجابة معروفة ومحددة  .. وبأقولها لكل العيانين .. وده اللي انا قلته لأسامة :

" لو الحول رجع لك في المستقبل يا أسامة .. فالحل اننا برضه نعمل عملية ونعدل الحول .. مفيش حل تاني  "

" بس انا خايف اعملها ويرجع تاني "

"  طيب يا اسامة عايز تقعد أحول كده طول عمرك عشان خايف ان الحول يمكن يرجع تاني .. والله القرار قرارك .. يا إما تسيب نفسك كده .. يا إما تعمل العملية وتتكل على الله ويمكن ان شاء الله تكون المرة دي من ال 90 % اللي الحول مش هيرجع لهم تاني "

انا فاكر ساعتها ان اسامة أخذ القرار الشجاع والصحيح انه يعمل العملية ويعدل الحول أفضل من انه يعيش كده طول عمره ..

عملت له العملية .. الحمد لله نتيجتها حلوة قوي .. أسامة ما اتصلش بيا لغاية دلوقتي .. معنى كده ان الحول ما رجعش .. يعني داخلين في السنة الخامسة ومفيش حول رجع والحمد لله .. وإن شاء الله ما يرجعش أبداً

د. جمــال صبـــحي