اتصل بي اسئلة شائعة استشارات عن بعد حالة هذا الأسبوع انواع الحول معلومات تهمك الصفحة الرئيسية


الحول الوحشي المرتجع 4



    
 

 

حالة هذا الاسبوع ( 51 ) .. محمد بورتر مستشفى الحياة للعيون

" باب النجار مش مخلع – قصة عملية "

انا باشتغل بعض عمليات الحول بتاعتي ياجماعة في مستشفى الحياة للعيون اللي ورا نادي الصيد في الدقي .. وطول عمري متعود اني اطلع في الاسانسير اللي بيدخل على طول على جناح العمليات .. المهم .. في يوم كان عندي عمليات في الحياة .. اليوم كان ماشي عادي .. لما وصلت المستشفى ..  " حسن النوبي " بوجهه المبتسم البشوش دايماً أخد المفاتيح عشان يركن لي العربية كالمعتاد .. دخلت المستشفى .. كانوا تقريبا بيطلعوا أدوية  في اسانسير العمليات .. المهم .. قالوا لي ممكن أطلع في الاسانسير التاني بتاع " البورتر " .. وهنا بدأت القصة ..

" البورتر " ده ياجماعة هو أحد العاملين في المستشفى والمسئول عن توصيل المريض من الاستقبال الى مكان علاجه في المستشفى وهو برضه اللي بياخد العيان من العمليات ويوصله لسريره وكده .. في الحقيقة انا عمري ماشفت أي بورتر في المستشفى .. انا دايماً موجود جوه العمليات لابس لبس معقم ومينفعش اطلع برة العمليات أبداً .. عشان كده انا عمري ماشفت أي بورتر من بتوع مستشفى الحياة ..  

ما علينا .. رحت على الاسانسير التاني بتاع البورتر .. دست على الزرار .. الاسانسير نازل من الرابع .. واضح ان البورتر كان بيوصل مريض لجناح الليزك .. الاسانسير وصل الأرضي .. باب الاسانسير اتفتح .. كان يقف داخل الاسانسير مفاجأة من العيار الثقيل .. الثقيل جداً

واضح من الزي الرسمي الأنيق اللي لابسه إن الشاب الطيب ده اللي في الاسانسير هو " البورتر " بتاع المستشفى .. بس شيئ لايصدقه عقل .. ايه ده ؟ .. دي حاجة متنفعش أبداً ياجماعة .. تصوروا ان " البورتر " بتاع مستشفى الحياة أحول .. وأحول جداً كمان .. عنده حول وحشي درجته كبيرة قوي ..  الولد فضل حاطط عينه في عيني كأن مفيش حاجة .. عادي خالص يعني ..  قال لي في منتهى الثقة

·         " اتفضل يادكتور " ..

·         " انت مين يا بورتر ؟ " ..

·         " انا محمد يادكتور ياجمال " ...

طلعني معاه العمليات الدور التالت وانا في منتهى الاستغراب وقاعد أفكر .. افتكرت على طول المثل الشهير بتاعنا " باب النجار مخلع " .. يعني ايه بورتر في المستشفى تكون عينيه كده .. وانا كنت رحت فين .. الناس تقول ايه .. يعني لو انا جايب عيان أعمل له عملية حول في الحياة وبعدين ركب الاسانسير مع محمد .. ياترى هيقول ايه .. يادي الكسوف .. ازاي احنا نسيب محمد كده .. المهم .. اخدت قرار فوري .. لايمكن أبداً أسيب باب النجار مخلع ..لايمكن .. أول مادخلت العمليات طلبت سهام " رئيسة العمليات " ..

·         انتي ليه ياسهام ما قلتيش قبل كده ان عندكم بورتر أحول

·         ده محمد يا دكتور جمال .. كنت لسه هاكلمك عنه .. هو عمل عملية من فترة قريبة .. بس الحول زي ماهو .. ماتعدلش .. هو مكسوف يكلمك .. فطلب مني اني استأذنك تعمل له العملية .. هو مأجل خطوبته ياعيني لحد ماعينه تتعدل

كلمت فوراً الدكتور عمرو السمرة والدكتور هاني حمزة .. وافقوا طبعاً على طول اني اعمل العملية لمحمد في الحياة .. يوم عملية محمد لاحظت اهتمام غير مسبوق من الممرضات والعاملين وكل هيئة العمليات بمحمد وعمليته .. كل التحضيرات والتجهيزات تتم على أكمل وجه كالمعتاد وأكثر .. ناس محترمة حقيقي .. انا فخور ياجماعة اني اشتغل وسط ناس زيكم .. ربنا يخليكم لبعض ..

المهم .. بعد 3 ايام بالظبط من عملية محمد .. عندي عمليات في الحياة .. وصلت المستشفى .. " حسن النوبي " ركن لي العربية كالمعتاد .. دخلت المستشفى ..

·         " اتفضل يادكتور "

·         " لا شكراً ياجماعة .. انا هاركب الاسانسير بتاع البورتر "

دست على الزرار .. الاسانسير نازل .. من الرابع برضه .. الاسانسير وصل الأرضي .. باب الاسانسير بيتفتح .. قلبي بيدق بسرعة .. الباب اتفتح .. مش ممكن .. مين الشاب الوسيم ده .. محمد ياجماعة بقى حاجة غير .. عمليته هايلة .. الحول اختفى تماماً .. كان بيضحك ومبسوط قوي .. وعزمني كمان على خطوبته  .. اتصورت معاه قدام باب العمليات .. وكل الممرضات والعاملين اتصوروا معاه وكانوا فرحانين بيه قوي.

حمد الله على سلامتك يا محمد .. ربنا يوفقك يابني .. وألف مبروك على الخطوبة

د. جمـال صبحي

 

 

 



الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders