حالة هذا الاسبوع ( 50 ) .. نورا شعبان 20 سنة .. من قنا

" الحول الوحشي المرتجع "

اكلمكم الأول عن مريضتي الرائعة نورا .. وبعدين نتكلم عن الحول

نورا ياجماعة بنت صعيدية زي العسل .. طالبة متفوقة في كلية العلوم قسم بيولوجي .. على فكرة ده أصعب قسم في كلية العلوم .. قالت لي انها بعد التخرج هتفتح معمل تحاليل طبية .. هتبقى دكتورة يعني ..  عندها في كليتها مشروع مشترك مع كلية الهندسة في أسوان طول الاجازة الصيفية .. وبعد كده هتدخل السنة الدراسية الجديدة على طول بعد العيد .. عايزة تعمل عملية الحول بس وقتها ضيق جداً .. كلمتني على الفيس .. اتفاجئت ببنت رزينة في منتهى العقل .. بتاخد وتدي .. وتناقش وتقرر .. لا ياجماعة .. البنات الصعايدة دول حاجة غير .. انا بأحبهم جداً .. بالظبط  زي الأغنية مابتقول .. بنت مصرية صعيدية وأصيلة .. لما تحتاجها تلاقيها سدادة .. بنت بسبع رجالة .. نورا رتبت معايا كل حاجة عشان العملية بتاعتها .. ميعاد حجز قطار الصعيد .. ميعاد الوصول .. حجز المستشفى .. هي عايزة تيجي مصر وتعمل العملية أول يوم بعد العيد وترجع قنا بعد 5 ايام عشان الكلية ..

طيب .. نورا عندها حول وحشي في عينها اليمين .. درجته كبيرة قوي .. البنت طبعاً مضايقة من شكلها .. بعتت لي على الفيس صورها مع زميلاتها في الكلية .. لأ طبعاً المنظر ده يا جماعة بيستفزني جدأ .. ازاي بنت في السن دي تعيش بالحول ده وتبقى مضايقة طول الوقت من شكلها .. ليه ياجماعة ؟ .. فيه ايه ؟ .. مع ان الحل موجود وسهل والله ..  ما علينا .. لما شفت اسرتها يوم العملية الصبح في المستشفى .. حسيت ان مامتها مش متشجعة قوي للعملية .. وعرفت بعد كده ان نورا عملت عملية الحول وهي بيبي والحول رجع تاني .. نورا نفسها ماتعرفش الموضوع ده .. مامتها خبت عليها هي واخواتها موضوع العملية القديمة دي .. قال ايه مكسوفة تقول لحد على عملية الحول القديمة دي .. انا عرفت طبعاً وانا باعمل العملية ان العضلات مش في مكانها وان البنت دي عملت عملية قبل كده .. عمليتها كانت صعبة .. بس الحمد لله ..

المهم .. نورا عملت لها العملية يوم الاتنين أول يوم شغل بعد العيد .. بعد يومين من العملية جت لي العيادة .. دي صورتها معايا .. اسرتها طلبت انهم يصوروها معايا .. الصعايدة اتغيروا خالص ياجماعة .. الصورة دي لو كانت على أيامنا كان يبقى فيها ضرب نار وكده ..

الحمد لله البنت بقت زي القمر .. حاجة تانية خالص .. هي مسافرة النهاردة قنا وهتروح كليتها السبت عادي .. قلت لها بس البسي نظارة شمس كام يوم كده عشان عينك لسه حمرا

حمد الله على سلامتك يادكتورة نورا ... وربنا يوفقك يابنتي

د. جمـال صبحي