رامي عبد ال...23 سنة من المحلة الكبرى

" انت عملت لي العملية يا دكتور جمال والحول رجع لي تاني "

فرصة وانا قبل ما اتكلم عن حالة رامي اللي انا عملته العملية وهو في اولى ثانوي –  يعني من حوالي 8 سنين كده والحول رجع له تاني - فرصة اني اقول لكم أكتر سؤال يا جماعة العيانين بيسألوه ليا سواء في العيادة أو على الفيس او بالايميل :

س 1 : رحت لدكاترة كتير وكلهم قالوا لي " اوعى تعملي العملية .. الحول هيرجع تاني .. صح الكلام ده يا دكتور ؟ "

- س 2 : هو صحيح يا دكتور جمال مادام العين ضعيفة يبقى لازم الحول يرجع بعد العملية ؟

- س 3 : طيب لو عملت العملية .. الحول هيرجع بعد كام سنة ؟

- س 4 : واحدة صاحبتي عملت العملية دي مرتين قبل كده .. هو صحيح كل أما تعملها الحول هيرد تاني ؟

- س 5 : انا عملت العملية قبل كده والحول رجع .. انا خايف جدا اعملها أحسن يرجع تاني .. مفيش حاجة نقدر نعملها عشان الحول مايرجعش ؟

س6 : انا عملت الحول مرتين قبل كده ورجع .. ينفع اعمله تاني ؟

بسم الله الرحمن الرحيم

طبعا يا جماعة فيه نسبة معروفة لاحتمال رجوع الحول تاني بعد العملية .. ولو رجع بيرجع بعد كام سنة كل الكلام ده اتهرس في ابحاث كتيرة قوي اتعملت على الاف من العيانين ؟

أولاً عايز اقول لكم الأول شوية كلام يطمنكم .. مش كل انواع الحول ياجماعة الحول بيرجع فيها .. فيه انواع حول كتيرة نسبة رجوع الحول فيها صفر % .. يعني العيان يعمل العملية وعينه تتعدل ومش ممكن الحول يرجعله تاني ابدا ..  ولما الحالات دي بتجيلي العيادة بأبقى سعيد قوي بيها .. وصور بقى .. قبل العملية .. وبعد العملية .. وفرحة بقى .. وتسلم ايديك يا دكتور جمال .. وكده يعني

دلوقتي هأقول لكم ملخص موضوع الحول المرتجع بمنتهى الصراحة بس مش عايز احباط .. كملوا الكلام للآخر :

- نسبة رجوع الحول يا جماعة مش نسبة عالية زي ما الناس فاكرة .. دي بتتراوح بين 5 % الى 15 %  فقط حسب نوع الحول .. يعني كل 100 عيان يعملوا العملية حوالي 90 منهم يعملوا العملية ويكملوا حياتهم زي الفل والحول مايرجعش لهم ابدا طول عمرهم

- طيب العشرة في المية التانيين اللي الحول رجع لهم تاني .. ياترى رجع لهم بعد كام سنة ؟ بصراحة يا جماعة فيه اللي بيرجع لهم الحول بعد العملية بسنتين كده وفيه اللي بيرجع لهم الحول  بعد  العملية بعشر سنين .. يعني ممكن اللي عنده حول مرتجع يكون عمل العملية وعاش 10 سنين زي الفل وبعدين الحول رجع له تاني .. زي رامي كده قعد 8 سنين كويس وبعدين الحول رجع له تاني زي مانتم شايفينه في الصورة

- طيب لو الحول رجع بنعمل ايه ؟ .. والله الاجابة بسيطة جداً .. وبأقولها لكل العيانين .. وده اللي انا قلته لرامي :

" فين المشكلة يابني .. ما هو انا اللي عدلتها لك في الأول .. وانا اللي هأعدلها لك دلوقتي .. انت مأوفر كده ليه ؟ .. أووفر يعني  "

" بس انا خايف اعملها ويرجع تاني "

" على أسوأ الفروض يا رامي .. هيرجع بعد 8 سنين تاني .. طيب يا رامي عايز تقعد أحول كده طول عمرك عشان خايف ان الحول يمكن .. ويجوز .. وربما ..وعسى .. ولعل يرجع تاني بعد 8 سنين .. ايه التفكير الخايب ده .. ما يرجع تاني .. ما يتنيل يرجع تاني .. وايه يعني .. واحنا كنا رحنا فين يعني ..  ماهو لو رجع تاني هنعدله تاني .. فين المشكلة .. انا مش شايف أي مشكلة "

رامي بعد الكلام ده اتشجع ياجماعة .. وعملت له العملية تاني يوم .. بس انا ما صورتوش بعد العملية على طول .. استنيت ييجي 3 اسابيع كده بعد العملية عشان العين بتبقى حمرا قوي في الحول المرتجع ..

المهم الحمد لله عمليته حلوة قوي .. زي أول مرة وأحسن

حمد الله على السلامة يارامي .. وان شاء الله مش عايز اشوفك تاني ابدا

د جمــال صبحي