حالة هذا الأسبوع ( 95 ) الحاجة عزيزة محمد .. 56 سنة .. من السويس

" الحول عند الكبار "

أولاً وقبل أي حاجة لازم اشكر الحاجة عزيزة اللي سمحت لي وبمنتهى الشجاعة اني انزل صورتها على الفيس في حالة هذا الاسبوع

ثانياً احب أبارك لها على النيولوك الجديد .. الف مبروك وحمد الله على سلامتك يا حاجة ..

نخش بقى في الموضوع

من اسبوع كده وانا في العيادة دخل عليا ولد وبنتين في العشرينات ومعاهم ست كبيرة شكلها مامتهم

مسكت القلم والأجندة بتاعتي عشان اكتب بيانات المريض .. بصيت لبنت من البنات .. اسمك ايه .. حضرتك اللي هتكشفي ؟ .. قالت لي لأ يا دكتور جمال .. احنا جايين من السويس عشان ماما .. ماما اسمها عزيزة محمد

انا في العيادة يا جماعة مش متعود اكشف على ماما .. طول عمري باكشف على الولاد أو البنات   

المهم .. بصيت للحاجة عزيزة مامتهم .. ست زي العسل .. خفة دم إيه .. وطيبة إيه .. وجدعنة إيه .. زي كل أهل السويس .. أنا عندي عيانين كتير من السويس .. كلهم كده .. وفيه معلومة مهمة معروفة عنهم .. الستات السوايسة أشطر طباخات في مصر ..  ده عن تجربة .. اتكلمت مع الحاجة عزيزة عن السمك والصيادية والملوخية بالجمبري وأكلهم الجميل اللي انتم عارفينه .. وطبعاً لقيتها إيه .. أستاذة

·       الحول ده عندك من إمتى يا حاجة ؟

·       من وأنا طفلة .. انا عشت عمري كله بالحول ده .. دخلت مدرسة وانا كده .. اتخرجت كده .. اشتغلت وانا كده .. اتجوزت وانا كده .. وعلى فكرة جوزي بيحبني جداً كده .. جبت ولادي وربيتهم وجوزتهم وانا كده برضه

·       طيب وايه اللي حصل ؟

·       ولادي على الفيس متابعين صفحتك يا دكتور جمال .. بيقرأوا كل كلمة بتكتبها .. فرجوني عل صور ستات كبار حضرتك عملت لهم العملية والحول اتعدل وشكلهم اتغير خالص .. انا في الحقيقة مش مصدقة .. ممكن الحول يتعدل في سني ده .. انا عندي 56 سنة .. ولا أنا كده اتأخرت ؟؟

" السؤال ده يا جماعة .. اكتر سؤال بيجيني كل يوم في الرسايل.. ينفع أعمل العملية ؟ .. ممكن أعمل العملية ؟ .. انا عندي 40 سنة ؟ .. انا عندي 50 سنة ؟ .. انا عندي 60 سنة ؟ ... ياجماعة عملية الحول بتتعمل في أي سن .. انا كتبت الكلام ده عشرات المرات .. أربعين .. خمسين .. ستين .. مفيش سن اسمه مينفعش نعمله عملية .. أي حول بيتعدل بالعملية .. في أي سن "

·       مش مهم انك اتأخرتي يا حاجة .. المهم انك في الآخر جيتي

عملت العملية للحاجة عزيزة تاني يوم الكشف .. النهاردة جت من السويس اشوفها بعد العملية .. انا فرحان قوي بالحالة دي .. سعادتي وهي داخلة عندي العيادة بالنيولوك الجديد مش قادر أوصفها ..  حالات الحول اللي بأعملها في السن ده مش كتير .. مش كل الستات في شجاعة الحاجة عزيزة .. كلهم بيقولوا نفس الكلام .. احنا هناخد زماننا وزمن غيرنا .. هو باقي في العمر أد اللي راح .. انا اتأخرت والقطر فاتني خلاص

بس انا دايماً بأقول :

" أن تأتي متأخراً .. خير من ألا تأتي أبداً "

د. جمــال صبـــحي