حالة هذا الأسبوع ( 239 ) منى عبد الرحمن .. 39 سنة .. من بورسعيد

يومياً ياجماعه افتح رسايل الصفحة ألاقي السؤال ده  :

انا عندي 30 - 40 - 50 سنة .. ينفع اعمل عملية حول في السن دي ؟

أحب اقول لكم الأول ان مفيش حاجه إسمها مينفعش تعمل عملية حول .. مهما كان عمرك .. اربعين .. خمسين .. ستين .. برضه ينفع تعمل العملية

صحيح انا دايماً اقول ان الحول لازم يتعدل في سن صغيره قبل العين متضعف الى آخر الكلام اللي با اكتبه كل يوم على صفحتي وخلاص كلكم حفظتوه

لكن برضه ياجماعه .. لو حد عاش كده طول عمره .. وبعدين فكر في أي وقت انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا لأ ؟  طبعاً ينفع .. مفيش أي مشكلة .. انا كل يوم باعمل عمليات حول لعيانين وانا والعيان بنكون عارفين ان العين الحوله هيفضل نظرها زي ما هو حتى بعد ما نعدل الحول

المفاجأة بقى اللي مش قادر اوصفها لكم .. الفرحة والسعادة عند الناس دول بعد العملية .. ضحكة جميلة تشوفها على وشهم ملهاش مثيل .. حاجة تفرح فعلاً .. نيولوك بجد

منى الست الطيبة اللي في الصورة دي جت لي من بورسعيد من اسبوعين كده .. ست طيبة جداً ودمها زي السكر .. قالت لي أنها متابعة صفحتي على الفيس من سنين .. قرأت كل الكلام اللي باكتبه عن الحول .. وأخيراً قررت أنها تعمل عندي العملية .. النهاردة منى جت لي استشارة بعد العملية بأسبوع .. طبعاً حاجة تانية خالص تخليني أصر على رأيي .. لأ ياجماعه .. محدش يوافق يكمل حياته أحول .. مهما كان عمرك .. إوعى توافق تكمل كده .. شوف منى .. شوف شكلها قبل العملية وشكلها بعد العملية .. ولسه لما عينها تروق بعد كام يوم كده .. منى قالت لي بالحرف الواحد صحيح القرار كان متأخر بس مش مهم .. المهم إني اتشجعت وأخدت القرار

برافو والله يا منى

" أن تأتي متأخراً خيرٌ من ألا تأتي أبداً "

حمد الله على سلامتك والف الف مبروك

د. جمــال صبـــحي