حالة هذا الأسبوع ( 137 ) استاذ احمد .. 58 سنة

" الحول عند الكبار "

انا عندي 58 سنة .. عندي حول .. ينفع اعمل عملية

يومياً افتح رسايل الصفحة ألاقي السؤال ده بيتكرر يومياً

" عندي سؤال يا دكتور جمال .... انا عندي كذا سنة ..  ينفع اعمل عملية حول ؟ "

طيب أحب اقول الأول ان مفيش من الناحية الطبية حاجة تقول ان مينفعش انسان مهما كان عمره انه يعمل عملية عشان يعدل الحول .. وكلمة مهما كان عمره دي ملهاش حدود .. اربعين .. خمسين .. ستين سنة .. برضه ينفع يعمل عملية ويعدل الحول

صحيح انا دايماً اكرر في كلامي ان الحول لازم يتعدل في سن صغيرة .. وان احنا بنعمل عمليات حول بمنتهى الأمان لبيبيهات سنهم 4 شهور .. وان الواحد ما يسيبش الحول موجود لحد أما يكبر لأن العين الحوله بتضعف ولازم نعدل الحول قبل النظر ما يضعف .. الخ الكلام اللي با اكتبه كل يوم وعارف ان انتم كلكم خلاص حفظتوه

لكن برضه ياجماعة .. لو واحد عاش كده طول عمره .. وبعدين فكر انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا .. لأ ؟

طبعاً ينفع .. مفيش أي مشكلة .. انا كل يوم باعمل عمليات حول لعيانين كبار في السن وانا عارف ان العين الحوله هيفضل نظرها زي ما هو حتى بعد ما نعدل الحول ..  

ودايماً باقول للعيان .. وحتى لو العين الحوله الضعيفة نظرها مش ممكن يتحسن .. طيب اضعف الايمان نعدل الحول ويبقى شكلك عادي وطبيعي .. ليه ترضى تعيش وحاسس انك ناقصك حاجة .. أو ان حد يبص لك بطريقة مش هي.        

انا خلال مشواري الطويل في التخصص ده ..  عملت شوية عمليات حول مش كتير لعيانين وعيانات عمرهم فوق الستين سنة .. والمفاجأة بقى ان انا مش قادر اوصف لكم الفرحة والسعادة اللي كانت عندهم بعد العملية وبعد الحول ما اتعدل .. ضحكة جميلة داخلين بيها العيادة بعد العملية .. ضحكة ملهاش مثيل تشوفها على وشهم لما يبصوا في المرايا لأول مرة بعد العمر ده ويلاقوا شكلهم طبيعي من غير حول .. حاجة تفرح فعلاً .. نيولوك بجد

حمد الله على سلامتك يافندم والف مبروك

د. جمــال صبـــحي