حالة هذا الأسبوع ( 118 ) جدة الطفله ندى .. 57 سنة .. من القاهرة

" ممكن نعمل عملية حول لتيته "

من شهر كده عملت عمليه حول لطفله أموره جداً اسمها ندى .. عندها 5 سنين .. بعد العمليه باسبوع كنت قاعد في العياده مستني ندى في الاستشاره عشان اطمن على عمليتها ..

دخلت ندى مع اسرتها .. باباها ومامتها اللي كانوا معاها قبل كده لما كشفت عليها قبل العمليه .. وكان معاهم ست تانيه .. واضح انها جدة ندى ..

المهم .. الأسره كلها داخله مبتسمه .. واضح الحمد لله ان ندى عمليتها حلوه .. بصيت لندى .. فعلاً عمليتها حلوه قوي .. البنت كانت جميله جداً بس الحول كان مبوظ شكلها .. النهارده بعد الحول ما اتعدل .. بقت حاجه تانيه خالص .. بنوته زي القمر .. الحمد لله

مامتها قالت لي : ندى عايزه منك حاجه يا دكتور جمال

 " قولي يا ندى "

وهي ماسكه ايد جدتها : ( ممكن يا عمو تعمل عمليه لتيته ؟ )

بصيت لتيته .. ست مصريه في وشها طيبة الدنيا كلها .. عندها حول وحشي في عينها الشمال  

طيب بمناسبة الست الطيبه دي اللي حفيدتها عايزه تعملها العمليه .. انا حابب اكلمكم عن موضوع الحول عند كبار السن

ياجماعه عملية الحول بتتعمل في أي سن .. انا كتبت الكلام ده كتير قوي .. مفيش سن اسمه مينفعش نعمله عمليه .. أي حول بيتعدل بالعمليه .. في أي سن .. من أول البيبي اللي عنده 4 شهور لغاية المريض اللي عنده 60 سنه وأكبر كمان .. عملية الحول بتتعمل للأطفال والكبار .. مفيش حاجة اسمها انا كبرت خلاص ومينفعش اعمل العمليه

صحيح عمليات الحول اللي بأعملها للكبار مش كتيره .. في السن دي الستات بيقولوا نفس الكلام .. احنا هناخد زماننا وزمن غيرنا .. هو باقي في العمر أد اللي راح .. انا طول عمري كده واتعودت على شكلي كده

المهم .. تيته قالت لي ان الحول ده عندها من وهي طفله وعمرها ما فكرت تعمل العمليه لحد ما شافت عملية ندى .. اتشجعت وقالت لازم اعمل العمليه ..

تاني يوم الصبح عملت العملية لتيته .. والنهارده بعد اسبوع ميعاد استشارتها بعد العمليه .. انا فرحان قوي بالحاله دي .. سعادتي وهي داخله عندي العياده بعد العمليه مش قادر أوصفها ..  ضحكة ايه .. وثقة ايه .. وفرحة ايه .. حاجه تانيه خالص .. تيته صحيح جت متأخرة شويه .. بس المهم انها في الآخر جت

الشكر كل الشكر لندى هي صاحبة الفضل الأول والأخير

حمد الله على سلامة تيته يا حبيبتي

د. جمــال صبـــحي