" الحول الوحشي المتقطع "

متقطع يعني العين مش حوله على طول .. ساعات تبقى حادفة لبره كده وساعات ما يكونش فيه أي حول

دي أهم الأسئلة اللي العيانين بيسألوها دايماً عن الحول الوحشي المتقطع :

" هو الحول المتقطع ممكن يضعف النظر ؟ "

-         العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. عشان كده نظرها مش بيضعف

" طيب ليه نعمل عملية مادام الحول ده مش بيضعف النظر ؟ "

-         رغم اني فعلاً بأقول للأمهات ان الحول المتقطع ملوش أي ضرر الا ان مفيش أم بتوافق أبداً انها تسيب ابنها او بنتها تحول بالمنظر ده ودايماً يطلبوا مني انهم يعملوا عملية عشان الحول ده ما يظهرش تاني

" هو الحول ده ملوش علاج إلا العملية ؟ "

الحول الوحشي المتقطع لايمكن نمنعه من الظهور إلا بعمل العملية قولاً واحداً .. النظارة والتمارين علاج مش مؤكد للحول المتقطع .. ساعات بتنفع وغالباً لأ.

" طيب نسبة نجاح العملية كام في المية ؟ "

نسبة نجاح عملية الحول الوحشي المتقطع تقريباً 100%

" طيب ايه انسب سن لعمل العملية ؟ "

سن 4 سنين هو أنسب سن لعمل عملية الحول الوحشي المتقطع

" طيب ممكن تتعمل في سن أصغر من كده ؟ "

لو الحول بيظهر كتير أوي يبقى العملية تتعمل طبعاً في أي سن مش لازم 4 سنين .. زي حمزة كده عملت له العملية قبل سن 4 سنين لأن الحول عنده كان بيزيد كل شويه

ألف حمد الله على سلامتك يا حمزة

عمليتك زي الفل