حالة هذا الأسبوع ( 235 ) .. محمد علي .. 11 سنة .. من الوادي الجديد

" الحول الوحشي المتقطع "

كل يوم ياجماعة افتح الرسايل ألاقي عشرات الأمهات بعتوا نفس الرسالة تقريباً  :

( انا ابني أو بنتي يادكتور عنده حول بس مش على طول .. ساعات عينه تحدف لبرة  وبعدين ترجع طبيعية خالص .. اسمه ايه ده يا دكتور جمال .. وعلاجه ايه ؟ )

ده ياجماعه اسمه الحول الوحشي المتقطع ( وحشي يعني العين بتحدف لبره ومتقطع يعني مش على طول .. ساعات يبقى فيه حول وساعات مفيش )

لو ابنك أو بنتك عندها حول وحشي متقطع يبقى لازم تقرأ الكلام ده :

·        ايه سبب الحول الوحشي المتقطع ؟

ج : سبب الحول ده ان العضله اللي بتشد العين لبره بتكون اقوى من العضله اللي بتشد العين لجوه .. فكل شويه العين تحول لبره .. المخ بياخد باله ان فيه حاجه غلط وان العين حدفت لبره .. فيشد العين لجوه تاني عشان تتعدل

·        ممكن لما بنتي تكبر شويه الحول ده يخف لوحده ؟

ج:  الحول الوحشي المتقطع مش بيخف لوحده أبداً ..

·        طيب هو ممكن يزيد مع الوقت ؟

ج: ممكن يزيد وممكن لأ

·        هو الحول الوحشي المتقطع ممكن يضعف العين ويعمل كسل ؟

ج: العين نظرها مش بيضعف أبداً من الحول المتقطع لأن كل شويه العين بتتعدل وتبص طبيعي خالص

·        هو الحول ده علاجه ايه ؟

ج: الحول الوحشي المتقطع علاجه عمليه

·        طيب ليه نعمل عمليه مادام الحول ده مش بيضعف  النظر ؟

ج: عشان الشكل .. مفيش أم بتوافق أبداً انها تسيب ابنها او بنتها تحول بالمنظر ده .. ومفيش برضه شاب او شابه يقبل ان عينه تحول بالمنظر ده وهو قاعد ولا قاعده مع اصحابهم وزمايلهم

·        طيب ايه انسب سن لعمل العمليه ؟

ج: أنسب سن لعمل العملية هو 4 سنين

·        يعني مينفعش نعمل العملية قبل سن 4 سنين ؟

ينفع .. بس لما يكون الحول بيظهر كتير جداً

·        العمليه بتبقى في عين واحده ولا الاتنين ؟

ج: عادةً بتكون في الاتنين

·        طيب نسبة نجاح العملية كام في الميه ؟

ج: نسبة نجاح عملية الحول الوحشي المتقطع تقريباً 100%

·        طيب ممكن يحصل مضاعفات من العمليه ؟

ج: ممكن .. فيه حاجتين ممكن يحصلوا عند عدد قليل جداً من المرضى أول حاجه انه يظهر عندهم بعد العمليه حول انسي بسيط جداً وده بيروح لوحده خلال شهرين من العمليه ونادراً لما بنحتاج عملية تاني عشان نصلحه .. تاني حاجه ممكن تحصل ان العيان ممكن يشوف ازدواج في الرؤيه بعد العملية وبرضه ده بيروح لوحده

الف حمد الله على سلامتك يا محمد ..  عمليتك حلوة قوي الحمد لله

د. جمــال صبـــحي