حالة هذا الأسبوع 24 : السيدة ن. المرشدي 52 سنة.. من القاهرة

" العين الثقيلة "   -  The Heavy Eye   

حول " العين الثقيلة " من انواع الحول الغريبة والنادرة .. العيان اللي عنده الحول ده بيكون عنده قصر نظر شديد قوي طول عمره ولابس نظارة سميكة جداً .. وسنة بعد سنة العيان بيلاقي عينيه دخلت لجوة ناحية الانف وكمان نازلة لتحت شوية ... وكل سنة العيان يلاقي عينيه عمالة تخش لجوة اكتر واكتر وتنزل لتحت شوية بشوية .. وبعدين في الآخرنلاقي العين بتثبت في مكانها .. زي ما باين في الصورة  كدة قبل العملية وما بتتحركش لا يمين ولا شمال ..طبعاً العين بيبقى شكلها غريب وفوق كدة كمان ما بتتحركش .. كتير بيغلطوا في تشخيصها ويفتكروه شلل في العصب السادس .. طبعاً هو فعلاً شبه شلل العصب السادس لكن هنا في مرض العين الثقيلة لما نعمل اشعة مقطعية بنلاقي العين كبيرة جداً .. اكبر من حجمها الطبيعي ( يمكن ضعفها او اكتر كمان ) .. ده لأن قصر النظر الشديد بيخلي العين كبيرة قوي .. المهم لما العين تكبر كدة .. وزنها بيزيد قوي وتبقى تقيلة .. عضلات العين يا جماعة ماتقدرش ابداً تشيل عين بالوزن ده .. فالعين تسقط لتحت ..  وطبعا برضه ما تقدرش تحركها .. عين بالوزن الرهيب ده هتحركها ازاي ..

السيدة الفاضلة ن. المرشدي مديرة كبيرة في هيئة مهمة في مصر ..جت لي العيادة وحكت لي تاريخها المرضي .. كأنها بتقرأ الترجمة الحرفية لهذا المرض كما وصفته المراجع الطبية .. " انا يا دكتور جمال عندي قصر نظر من وانا في اولى ابتدائي .. ابتديت ب 4 درجات .. لحد ما وصلت دلوقتي لناقص 26 ... نظارتي زي ما انت شايف كدة تخينة ازاي .. انا راضية بيها واتعايشت معاها والحمد لله .. لكن من خمس سنين كدة لقيت عينيه عمالة تخش لجوة شوية بشوية وكمان ملاحظة انها بتنزل لتحت كمان .. واللي زاد كمان ان انا مش باقدر دلوقتي احركها للجنب .. ثابتة في مكانها كدة .. انا لما احتاج اقرأ أي ورقة في الشغل باحرك راسي يمين وشمال لأني مش باعرف احرك عينيه " .. كان ناقص تقوللي " انا عندي حول العين الثقيلة !! " .. على طول طلبت اشعة مقطعية .. النتيجة كانت واضحة .. العين كبيرة قوي وساقطة لتحت ..

" الف بعد الشر عليكي .. الحل عملية يافندم "

" نتيجتها كويسة يا دكتور جمال ؟ "

" ان شاء الله يافندم .. مادام وصلنا للتشخيص الصح .. يبقى ان شاء الله القرار هيكون سليم والنتيجة هتكون مرضية بإذن الله "

عملت العملية تاني يوم .. حقيقي كانت صعبة جداً .. العين كبيرة قوي والمكان ضيق خالص ومزنوق جداً .. والشغل كان في العضلات الافقية والرأسية في العينين مش عين واحدة .. العملية خدت وقت طويل صحيح .. بس النتيجة ياجماعة كانت مذهلة .. الحمد لله رب العالمين .. وكمان العين بقت بتتحرك يمين وشمال .. عملية تفرح والله .. 

حمد الله على سلامتك يافندم .. والف مبروك ..

" من فضلك يافندم عمليتك حلوة قوي .. عايز انزلها في صفحتي في حالة هذا الاسبوع بعد اذنك طبعاً "

" اوكي يا دكتور جمال .. بس والنبي خبي وشي شوية "

" حاضر يافندم والف شكر "

د. جمــال صبـــحي