حالة هذا الأسبوع  ( 122 )  سجى العطيوي  13 سنه  .. من اليمن

" الحول الأنسي والعين الكسلانه  "

" سجى " بنت يمنيه كانت مامتها راسلتني على الفيس من فتره وسألتني على حالتها .. ودار بيننا الحوار التالي :

مامتها : احنا من اليمن يا دكتور جمال .. عايز اسألك على بنتي .. بنتي اتولدت طبيعيه تماماً .. وهي عندها 4 سنين بدأ الحول يظهر عندها .. في الأول الحول كان بيبدل .. مره يظهر في العين اليمين ومره يظهر في الشمال ..

رحنا كشفنا عليها .. رحنا لأكتر من مستشفى عندنا .. كلهم أجمعوا انها محتاجه نضاره عشان عندها طول نظر .. عندها عين 4 درجات وعين 3 درجات وده سبب الحول اللي عندها ولو لبست النضاره الحول هيتعالج من غير عمليه ولا حاجه .. " سجى " كانت صغيره ورفضت تلبس النضاره .. وانا بصراحه مكنتش مهتمه قوي بموضوع النضاره .. قلنا نسيبها لما تكبر شويه ونبقى نشوف حل .. دلوقتي الحول ثابت عندها في العين اليمين بس .. مش بيبدل زي الأول.

انا : " سجى " يا فندم مثال واضح على اهمال علاج حول طول النظر عند الأطفال .. وازاي بدل مانعالج الحول في منتهى البساطه بان ابننا يلبس نضاره وخلاص .. لأ يبقى العلاج بعمليه وعلاج كسل العين ولبس نضاره برضه .. طبعاً الحول عند البنت من 9 سنين .. أكيد العين الحوله بقت كسلانه وضعيفه جداً .. في الوضع ده البنت محتاجه نعدل الحول بعمليه .. ونعالج الضعف والكسل بتمارين التغطيه .. ونعالج طول النظر بلبس نضاره .. بس لما تيجي مصر ابقى اشوفها ان شاء الله واتأكد من التشخيص

مامتها :  انا من اليمن .. يكفيني كام يوم في مصر عشان اعمل العملية وارجع بلدي تاني ؟

·        يكفيك جداً 4 ايام .. يوم اشوفها في العياده .. وتاني يوم الصبح نعمل العمليه .. واطمن عليها بعد العمليه بيومين كده .. وبعدين تسافروا بالسلامه

أخيراً .. " سجى " جت لي العياده مع باباها ومامتها .. وصلوا مصر امبارح بلليل .. كشفت عليها .. لقيت فعلاً عندها العين اليمين ضعيفه جداً وفيها طول نظر حوالي 4 درجات .. وعشان البنت مش بتلبس نضاره طول السنين دي وكانت مركزه طول الوقت على العين السليمه بس .. فالعين اليمين ضعفت  وبقى نظرها وحش قوي وكمان ثبت فيها الحول .. وكل شويه الضعف بيزيد والحول برضه بيزيد

أنا : زي ما قلت لك يا مدام على الفيس لازم نعدل الحول ده بعمليه .. العمليه هتكون في عينيها الاتنين مش في اليمين بس .. ونلبس نضاره بعد الحول ما يتعدل بالعمليه ان شاء الله .. ونعمل بعد كده تمارين تغطيه عشان الكسل ..

المهم .. اتفقنا نعمل العمليه تاني يوم

الحمد لله رب العالمين .. عملتلها العمليه والحول اتعدل تماماً.. دي صورتها بعد العمليه بيومين .. جت لي العياده النهارده .. عملت لها كشف نضاره وفهمت مامتها ازاي تعمل تمارين التغطيه .. وان شاء الله يسافروا اليمن بكره .. وابقى اطمن على النظر بعد 6 شهور .. وربنا يسهل

الف مبروك يا بنتي وحمد الله على السلامه

د. جمــال صبحــي