حالة هذا الأسبوع  ( 111 )  هاله  16 سنه  .. من قنا

" الحول الأنسي والعين الكسلانه  "

بمناسبة حالة هاله عايز اتكلم النهارده عن اهمال علاج ضعف النظر عند الأطفال

هاله طالبة في تانيه ثانوي جت لي العياده من الصعيد مع باباها ومامتها

أنا :  الحول ده عند هاله من إمتى يا حاجه ؟

مامتها : الحول ظهر وهي في أولى ابتدائي .. يعني كان عندها حوالي 6 سنين

أنا : طيب سايباها كده طول السنين دي ليه يا حاجه ؟

مامتها : لا والله ما سبناها .. رحنا بيها لدكاتره كتير .. كلهم قالوا محتاجه نضاره عشان عندها عين قويه وعين ضعيفه .. كانت عيله بقى ورفضت تلبس النضاره .. واحنا كمان في الصعيد بنتكسف من النضارات .. خصوصاً للبنات .. قلنا نسيبها لما تكبر شويه ونبقى نشوف حل

قمت كشفت على هاله .. لقيت فعلاً عندها العين الشمال ممتازه .. سته على سته .. بس اليمين فيها قصر نظر حوالي 4 درجات .. هو صحيح مش كتير لكن عشان البنت مش بتلبس نضاره طول السنين دي وكانت مركزه طول الوقت بالعين السليمه .. فالعين اليمين ضعفت  وبقى نظرها وحش قوي وكمان ظهر فيها الحول .. وكل شويه الضعف بيزيد والحول برضه بيزيد

أنا : طيب يا حاجه .. هاله محتاجه حاجتين .. أول حاجه .. لازم تلبس النضاره ونغطي العين السليمه وتبص بالعين الضعيفه بس حوالي 3 ساعات في اليوم عشان ننشط نظر العين دي

والحاجه التانيه لازم نعدل الحول ده بعمليه .. لأن لما نظرها يتحسن مع التغطيه .. الحول هيخلي العين تضعف تاني .. يبقى لازم نعمل الحاجتين مع بعض .. مينفعش نعمل حاجه واحده .. لازم ننشط النظر ولازم برضه نعدل الحول .. ولو مكسوفين جداً من النضاره يبقى تعمل ليزك لما توصل 18 سنه ان شاء الله

بدأنا جلسات التنشيط والنضاره .. بعد 3 شهور هاله جت تاني ولقيت الحمد لله نظر العين اليمين اتحسن جداً فقررنا نعمل العمليه عشان نعدل الحول

الحمد لله رب العالمين .. عملت لهاله العمليه والحول اتعدل تماماً وكمان العين نظرها اتحسن مع تمارين التنشيط .. يعني البنت بقت زي الفل .. دي صورتها بعد العمليه 

الف مبروك يا بنتي وحمد الله على السلامه

د. جمــال صبحــي