حالة هذا الاسبوع ( 45 ) .. شريفة ح. ع. 20  سنة من الأقصر

قبل ماتكلم عن الحالة .. باشكر شريفة ومامتها وباباها مع انهم صعايدة الا انهم سمحوا لي اني انزل صورتها على صفحتي .. شريفة قالت لي بالحرف الواحد " طبعاً تنزل صورتي ونص .. لازم كل بنت في سني عندها حول تشوف صورتي .. بنات كتير عايشين كده يا دكتور جمال وراضيين بحالهم ومش عارفيين ان الحل سهل كده ..

انا لما شفت نفسي بعد العملية قلت ايه الغباء اللي انا كنت فيه ده .. ازاي سبت نفسي لحد اما بقيت عشرين سنة عايشة بالشكل ده .. الحمد لله .. ربنا يخليك وتسلم ايديك

شريفة مثال تاني ياجماعة لاهمال علاج ضعف الابصار بأحد العينين ... شريفة عندها عينها الشمال نظرها ضعيف جداً من ايام الابتدائي .. بتشوف بيها  بتاع ستة على ستين كده .. يدوبك بتشوف بيها العلامة الكبيرة بالعافية ... أما عينها اليمين قوية جداً .. ستة على ستة يعني .. شريفة عاشت طول عمرها معتمدة على العين اليمين بس وسابت عينها التانية الضعيفة من غير نظارة ولا علاج ولا حاجة خالص .. فطبيعي ظهر عندها الحول ده .. وزي ما قلتلكم قبل كده .. العين اللي مش بنشوف بيها عادة بتحول .. مامتها وباباها سابوها حولة .. قالوا دي لسه عيلة صغيرة .. لما تكبر شوية نبقى نشوف حل في موضوع الحول ده.. عينها الشمال الحولة ضعفت اكتر .. والحول برضه زاد اكتر واكتر ... تصدقوا ياجماعة البنت خلصت الثانوي ودخلت الجامعة وهي بالشكل ده .. هي النهاردة في سنة تانية كلية ..

·     طيب اشمعنى النهاردة يعني جايين تشوفوا حل لموضوع الحول يافندم

·     بصراحة يادكتور جمال شريفة هتتجوز ابن عمها في الاجازة دي .. وطبعا مش معقول تتجوز وهي بالشكل ده

·     طبعاً حضراتكم عارفين ان شريفة عندها 20 سنة دلوقتي والعين ضعيفة جداً وفيها كسل جامد قوي .. العملية هتعدل الحول .. لكن الكسل ممكن يتعالج وممكن لأ .. لأن حضراتكم اتأخرتم قوي على البنت .. كان لازم نعمل العملية قبل كده ياجماعة .. على العموم ربنا يسهل ونقدر نعالج الكسل برضه

المهم .. انا عملت العملية لشريفة من اسبوع كده .. النهاردة جت لي استشارة .. عينها اتعدلت الحمد لله .. شكلها اتغير خالص بصراحة .. البنت طلعت حلوة والله ..  ان شاء الله هتبقى عروسة زي القمر .. وكمان طلبت منها تبعت لي صورتها وهي منورة في الكوشة جنب عريسها .. بالمناسبة ياجماعة انا باطلب صورة الكوشة دي من كل البنات اللي عملتلهم عملية في سن شريفة .. انا شايل عندي في العيادة صور عرايس زي القمر كتير قوي

حمد الله على سلامتك يا بنتي وألف مبروك مقدماً ...

د. جمــال صبـــحي