حالة هذا الأسبوع ( 40 )  احمد عودة 16 سنة  .. من اسيوط ..

الحول الانسي عند الكبار

احمد 16 سنة ياجماعة .. يعني لسه بيقول لحياته ومستقبله " بسم الله الرحمن الرحيم " .. بيبدأ خطوة جديدة في حياته .. بقى شاب خلاص  .. هيبتدي بقى يخرج برة البيت والمدرسة .. هيقابل ناس جديدة .. وهيعرف ناس تانية .. هيخش في شلة اصحاب .. هيلبس جينز وكوتشي .. وهيتمرن في الجيم عشان يعمل فورمة وكده ..  هيروح مركز الشباب يلعب كورة مع صحابه .. في البيت باباه ومامته هيعتمدوا عليه ويعملهم المشاوير .. يعني خلاص ياجماعة .. بالمختصر كده احمد بقى راجل .. مش كده وبس .. ده راجل وصعيدي كمان.

" بس ازاي ياجماعة احمد هيعمل كل ده

وهو شكله – انا اسف - وحش كده "

اسمحولي انا عايز اتكلم بصراحة شوية .. كل ما درجة الحول كانت كبيرة قوي .. كل ما شكل الانسان بيبقى وحش قوي .. الحول بيبوظ شكل البني ادم خالص .. مش كده وبس .. الحول الجامد قوي زي اللي عند احمد كده بيأثر على شخصية الولد ونفسيته .. انا ساعات والله مش باخد بالي من كده غير بعد ما اعمل العملية واتفاجئ بعديها بولد تاني خالص .. مش في الشكل بس .. لا والله .. باحس ان الولد شخصيته ونفسيته اتعدلت زي ماعينه اتعدلت .. ثقة ايه .. ولباقة ايه .. وضحك ونكت ايه .. لا والله حاجة غير .. 

" ايه ده يا جماعة .. مين ده ؟؟؟ .. مش هو ده احمد بتاع زمان "

الشكر الأول واجب لعم " عودة " .. ابو احمد .. راجل صعيدي صح ( بضم الصاد ) .. راجل عشرة على عشرة .. قال ازاي اسيب ابني يعيش بالشكل ده ويفضل طول عمره متعقد وحاسس انه اقل من غيره .. لاعارف يكلم حد .. ولا قادر يبص في عين حد .. ودي تبقى عيشة دي .. دي تبقى عيشة سودا .. جاب ابنه من اسيوط للقاهرة .. ييجي 10 ساعات سفر .. وقعد يستناني في العيادة .. الحوار مع عم عودة كان قصير جداً .. بس منجز .. " كلمة ورد غطاها " زي ما بيقولوا :

·     الواد احمد ده يادكتور جمال سندي وراجلي .. زي ما انت شايف كده عينه عفشه قوي " يعني شكلها وحش " .. عايزينه يبقى زي العيال الزين اللي انت منزل صورهم على النت

·      ان شاء الله ياعم " عودة "

مش باقول لكم " كلمة ورد غطاها "

 وشاء الله تعالى فعلاً .. تاني يوم الصبح ياجماعة عملت العملية لاحمد .. زاوية الحول كانت كبيرة قوي عشان كده انا عملت العملية في عينيه الاتنين .. بصراحة النتيجة كانت ناجحة جداً ..  سافروا على طول بعد العملية لأسيوط .. النهاردة بعد اسبوعين من العملية عم عودة جه .. ومعاه شاب .. اناقة ايه .. وشياكة ايه .. وقصة شعر ايه

·     مين ده ياعم عودة ؟ بابتسامة عريضة

·     تسلم ايديك يا دكتور جمال

·     الحمد لله .. يستاهل الحمد

د. جمــال صبحــي