حالة هذا الأسبوع  ( 307 )  نورهان .. 10 سنين  .. من أسيوط

" الحول الأنسي والعين الكسلانه "

بمناسبة الحاله الجميله بتاعة نورهان القمر دي .. عايز اكلمكم النهارده عن أهمية علاج حول العين الضعيفه

والد نورهان جالي العياده من 3 شهور تقريباً .. قال لي ان الحول ده عند نورهان من وهي عندها ييجي سنتين .. احنا مسكتناش .. رحنا بيها لدكاتره كتير .. كلهم قالوا محتاجه نضاره عشان عندها عين قويه وعين ضعيفه ..

قمت كشفت على نورهان .. لقيت فعلاً عندها العين الشمال ممتازه .. سته على سته .. بس اليمين الحوله نظرها ضعيف جداً .. يدوبك شايفه العلامه الكبيره بالعافيه .. عشان كده نورهان مركزه طول الوقت على العين السليمه .. فالعين اليمين ضعفت  وبقى نظرها وحش قوي وكمان ظهر فيها الحول .. وكل شويه الضعف هيزيد والحول برضه هيزيد

في الحالات اللي زي دي اللي فيها العين الحوله ضعيفة .. المريض بيكون محتاج حاجتين مع بعض .. أول حاجه .. لازم يلبس نضاره ونغطي العين السليمه ويبص بالعين الضعيفه بس عشان ننشط نظر العين دي

.. والحاجه التانيه لازم نعدل الحول ده بعمليه .. مينفعش نعمل حاجه واحده .. لازم ننشط النظر ولازم برضه نعدل الحول .. المهم عملت لنورهان العمليه والحول اتعدل تماماً   .. بعد العمليه على طول بدأنا جلسات التنشيط والنضاره .. بعد 3 شهور نورهان جت لي تاني ولقيت الحمد لله نظر العين اليمين اتحسن جداً .. يعني البنت بقت زي الفل .. مفيش حول .. والعين كمان نظرها بيتحسن .. وأهم حاجه بقت زي القمر ..

الف مبروك يا بنتي وحمد الله على السلامه

مركز علاج الحول

-------------------------------------

د. جمال الدين احمد صبحي

رئيس قسم الحول

بالمعهد التذكاري للأبحاث الرمدية