حالة هذا الأسبوع  ( 179 )  نهى عبد الستار  19 سنه  .. من بني سويف

" الحول الأنسي والعين الكسلانه  "

بمناسبة حالة نهى عايز اتكلم النهارده عن اهمال علاج ضعف النظر عند الأطفال

نهى طالبة في تانيه كلية .. من شهر كده جت لي العياده من الصعيد مع باباها ومامتها

أنا :  الحول ده عند نهى من إمتى يا جماعة ؟

مامتها : نهى كانت مولودة طبيعية خالص زي أي بنت .. وهي عندها 6 سنين ظهر الحول عندها ..  كانت ساعتها في أولى ابتدائي

أنا : طيب لما ظهر الحول ياحاجة رحتوا فين .. عملتوا ايه .. احكوا لي بالتفصيل .. ولا سبتوها كده ؟

مامتها : لا والله ما سبناها يا دكتور جمال .. رحنا بيها لدكاتره كتير .. كلهم قالوا محتاجه نضاره عشان عندها عين قويه وعين ضعيفه جداً .. كانت عيله بقى ورفضت تلبس النضاره .. واحنا كمان في الصعيد بنتكسف من النضارات .. خصوصاً للبنات .. قلنا نسيبها لما تكبر شويه ونبقى نشوف حل

قمت كشفت على نهى .. لقيت فعلاً عندها العين الشمال ممتازه .. سته على سته .. بس اليمين فيها قصر نظر حوالي 4 درجات .. هو صحيح قصر نظر مش جامد أوي لكن عشان البنت مش بتلبس نضاره طول السنين دي وكانت مركزه طول الوقت بالعين السليمه .. فالعين اليمين ضعفت  وبقى نظرها وحش قوي .. مش بتشوف بيها حتى العلامة الكبيرة وطبعاً بقت حوله.. بس الحمد لله ماحصلش فيها كسل شديد .. بالرغم من طول مدة الحول وإهمال لبس النضارة إلا انها بتتحسن بالنضارة بدرجه معقوله جداً

أنا : طيب دلوقتي نهى محتاجه حاجتين مع بعض يا حاجه .. .. مينفعش نعمل حاجة ونسيب التانية .. أول حاجه لازم نعدل الحول ده بعمليه .. والحاجه التانيه لازم تلبس النضاره عشان نحسن نظر العين دي .. لازم نحسن النظر ولازم برضه نعدل الحول .. لأن لو نظرها اتحسن وسبناها حوله .. الحول هيخلي العين تضعف تاني .. يبقى لازم نعمل الحاجتين مع بعض .. مينفعش نعمل حاجه واحده .. .. النظر هيتحسن بالنضارة ولو مكسوفين جداً من النضاره يبقى تعمل ليزك بعد عملية الحول بأسبوعين كده

المهم .. عملت لنهى العمليه والحول اتعدل تماماً .. بعد العملية بشهر كده نهى راحت عملت ليزك في العين اليمين وبعد الليزك العين دي بقت بتشوف ستة على اتناشر

نهى بعتت لي على الواتس النهاردة صورتها بعد ما عملت الليزك .. بسم الله ما شاء الله .. البنت بقت زي القمر .. حاجة تانية خالص

الف مبروك يا بنتي وحمد الله على السلامه

د. جمــال صبحــي