حالة هذا الاسبوع ( 209 ) ملك ايمن 11 شهر .. من القاهرة

" الرقبة المعووجة والحول "

كل يوم بافتح رسايل الفيس ألاقي أمهات باعته صور ولادها زي القمر .. بس بيبصوا بالجنب زي مانتم شايفين صورة ملك كده قبل العملية

مامة ملك كانت عندي في العيادة من اسبوعين كده

" ملك عاوجة رقبتها من ساعة ماتولدت يادكتور جمال زي صور الحالات اللي انت بتعرضها على صفحتك .. يارب يكون شفاها على ايدك "

طيب ايه علاقة الحول بالرقبة المعووجة

تخصص الحول وعضلات العين يا جماعة تخصص دقيق جداً .. مش حول بس زي مانتم فاكرين .. امراض عضلات العين كتيرة جداً .. يعني مش لازم ياجماعة يكون الطفل عنده حول عشان يروح يكشف عند دكتور تخصص حول .. الحول ده مجرد مرض من الامراض الكتيرة اللي بنعالجها

انا حكيت لكم قبل كده عن عوجة الرقبة عند الاطفال وعلاقتها بالعين .. حالة ملك من الحالات دي .. الحالة دي من الحاجات اللي بنشوفها كتير وبنتسأل عليها دايماً

" ابني بيبص بالجنب نكشف عند تخصص ايه يا دكتور ؟ "

طيب عايزين الأول نعرف ايه الاسباب اللي تخلي بيبي زي ملك يبص بالجنب

·       اول سبب ان تكون رقبتها فيها حاجة

·       تاني سبب ان تكون عندها استيجماتيزم ومحتاجة نظارة

·       تالت سبب ان تكون عندها حاجة في الأذن

·       رابع سبب وده بقى صميم تخصصنا .. ان تكون عضلات العين هي سبب عوجة الرقبة .. يعني يكون عندها مرض من امراض عضلات العين اللي تخلي البيبي يبص بالجنب كده .. ودي أمراض كتيرة جداً يا جماعة مش مجال لحصرها دلوقتي

المهم .... انا لقيت ملك سبب عوجة رقبتها واحد من أمراض العضلات دي .. اللي عايز اقوله ولازم تفهموه كويس ان ملك لما بتبص بالجنب كده بتشوف أحسن بكتير لو بصت طبيعي لقدام .. فيه حتة حلوة في الجنب هي بتحبها وقاعدة تبص لها على طول .. هي بتشوف كده احسن بكتير .. لو عدلت رقبتها الدنيا بتتلخبط قدامها خالص فترجع تبص بالجنب تاني .. باصه بالجنب كده على طول .. مامتها تعدلها رقبتها .. برضه ترجع تبص بالجنب تاني .. وبغض النظر عن نوع المرض اللي خلاها كده .. فالهدف من العملية عشان تبطل تبص كده وتعدل رقبتها وتبص قدامها طبيعي  اننا نحرك عضلات العين ونجيب لها الحتة الحلوة دي قدامها

وطبعاً دي عملية ضرورية جداً ولابد من عملها .. طيب ملك دلوقتي هتتفرج على التليفزيون وهي باصه بالجنب كده .. ولما تكبر هتلعب مع صحابها وهي باصه لهم بالجنب كده .. طيب لما ملك تخش المدرسة .. تخيلوا معايا .. هتبص للسبورة ازاي؟ .. هتحل الواجب ازاي؟ .. المهم

" ملك يا مدام عندها مرض في عضلات العين اسمه متلازمة دوين النوع الأول ومحتاجه عملية عشان تعرف تبص قدام زينا .. مفيش حل تاني "

الحمد لله رب العالمين .. عملت لملك العملية من اسبوع .. جت لي النهاردة استشارة .. بصراحة حاجة تفرح ..  من أول مامتها مادخلت الأوضة .. نتيجة العملية واضحة جداً .. بطلت تبص بالجنب خلاص .. بقت عادية خالص

الف مبروك يافندم وربنا يخليها لك

د. جمـال صبحي