حالة هذا الأسبوع ( 189 ) : جوفاني مينا .. 3 سنين .. من القاهرة

" متلازمة دوين "

متلازمة دوين مرض خلقي .. يعني الطفل بيتولد كده .. المرض ده بيصيب عضلات العين ويخليها تشتغل بطريقة غلط

في متلازمة دوين العضلات اللي بتحرك العين بتشتغل كلها في نفس الوقت وعكس بعض .. يعني مثلا ييجي الطفل يبص لليمين يقوم العضلة بتاعة الحركه الشمال تشتغل برضه .. فالعين متعرفش تروح للجنب اليمين ..  وساعات العكس فالعين متعرفش تروح للجنب الشمال .. وساعات برضه الحاجتين بيحصلوا مع بعض فالعين متعرفش تروح للجنب الشمال ولا الجنب اليمين .. عشان كده مرض متلازمة دوين له اشكال وانواع كتيرة قوي حسب لخبطة العضلات دي شكلها عامل ازاي .. عشان كده الدكاترة بيقولوا للمريض انت عندك متلازمة دوين من النوع الأول أو النوع التاني أو النوع التالت وكده ..

المهم .. فيه 5 حاجات ممكن تحصل في مرض متلازمة دوين .. ساعات الطفل يبقى عنده الخمس حاجات مع بعض .. وساعات نلاقي عنده حاجة واحدة بس من الخمسة أو حاجتين أو أكتر .. الخمس حاجات دي هي :

1. العين اللي فيها متلازمة دوين مش بتتحرك للجنب زي ما قلنا

2. عشان العضلة اليمين والعضلة الشمال بيشدوا العين في نفس الوقت فالعين تتشد لورا .. فساعات نلاقي العين تضيق وتبان اصغر من العين التانية بكتير

3. الاطفال دول لما يبصوا للجنب ساعات تلاقي العين اللي فيها دوين بتطلع لفوق وساعات بتنزل لتحت

4. ساعات الطفل لما يبص قدامه يكون عنده حول انسي وساعات حول وحشي وساعات يكون مفيش حول خالص

5. آخر حاجة ممكن تكون موجودة في متلازمة دوين ان الطفل نلاقيه عاوج رقبته على طول عشان مش عارف يحرك عينه للجنب

طيب هو مرض متلازمة دوين الملخبط ده العملية بتقدر تعالج كل الحاجات الخمسة دي  ؟؟

لأ .. العملية بتعالج 4 حاجات بس :

أولا: لو فيه حول انسي او وحشي بيتعالج بالعملية

ثانيا: لو العين ضيقة قوي .. بعد العملية هتبقى في نفس وسع العين التانية

ثالثا: العين لما تبص للجنب مش حتطلع لفوق أو تنزل لتحت تاني بعد العملية

رابعا: رقبة الطفل هتتعدل .. مش هتتعوج تاني بعد العملية ويبص قدامه عادي زي بقية الأطفال

الحاجة الخامسة هي اللي مش بتتعالج بالعملية ودي حاجة مهمة ان العين برضه لما تيجي تتحرك للجنب مش هتعرف تروح للجنب ولازم الامهات يعرفوا كده قبل العملية .. لازم يعرفوا ان العملية مش بتخلي للعين تتحرك للجنب

عشان كده أي أم بتسألني عن ابنها اللي عنده متلازمة دوين " نعمله العملية ولا لأ يادكتور جمال ؟ "

الإجابة واضحة جداً يا جماعة

" شوفي يامدام ابنك لوعنده حاجة من الحاجات الأربعة اللي العملية بتعالجها يبقى نعمله العملية .. لكن لو ابنك معندوش حاجة من الأربع حاجات دول وكل مشكلته ان عينه مش بتروح للجنب ومفيش عنده حاجة تانية يبقى متعمليش العملية لأن عينه بعد العملية برضه مش هتروح للجنب "

جوفاني عنده متلازمة دوين .. عنده 3 حاجات من الحاجات الخمسة اللي قلنا عليها بيتصلحوا بالعملية

أول حاجة جوفاني لما بيبص قدامه بيكون عنده حول وحشي

تاني حاجة جوفاني لما بيبص لليمين نلاقي العين اللي فيها دوين  بتنزل لتحت زي ماهو باين في صورته قبل العملية

تالت حاجة جوفاني عاوج رقبته على طول .. مش بيعرف يبص الا وهو عاوج رقبته

فهمت مامته ان ال 3 حاجات دول هيتصلحوا بالعملية .. لكن برضه لازم تكوني فاهمة ان برضه العين بعد العملية مش هتتحرك للجنب .. يعني الحول الوحشي هيتعالج .. والعين مش هتنزل لتحت بالمنظر ده .. وجوفاني بعد العملية هيعدل رقبته ويبص عادي زي باقي الولاد

الحمد لله .. بعد العملية جوفاني اتصلح عنده ال 3 حاجات فعلاً وبقى أفضل ألف مرة من الأول  

حمد الله على سلامتك يا حبيبي

د. جمــال صبـــحي