حالة هذا الأسبوع ( 165 ) : ندى .. سنتين .. من القاهرة

" متلازمة دوين والعين المختفية "

متلازمة دوين مرض خلقي .. يعني الطفل بيتولد كده .. المرض ده بيصيب عضلات العين ويخليها تشتغل بطريقة ملخبطة

سبب متلازمة دوين ان الاعصاب اللي بتحرك العين بتشتغل في نفس الوقت وعكس بعض .. يعني مثلا ييجي الطفل يبص لليمين يقوم العصب بتاع الحركه الشمال هو اللي يشتغل ويشد العين ناحيته .. فالعين متعرفش تروح يمين ..  عشان كده مرض متلازمة دوين له اشكال وانواع كتيرة قوي

المهم .. فيه 5 حاجات ممكن تحصل في مرض متلازمة دوين .. ساعات الطفل يبقى عنده الخمس حاجات مع بعض .. وساعات نلاقي عنده حاجة واحدة بس أو حاجتين أو أكتر .. الخمس حاجات دي هي :

1. العين اللي فيها دوين مش بتتحرك للجنب

2. عشان العضلة اليمين والعضلة الشمال بيشدوا العين في نفس الوقت فالعين ترجع لورا .. فساعات نلاقي العين تضيق وتبان اصغر من العين التانية بكتير

3. الاطفال دول لما يبصوا للجنب ساعات تلاقي العين اللي فيها دوين بتطلع لفوق وساعات بتنزل لتحت لدرجة ان العين ساعات بتختفي تماماً ويبقى شكل الطفل غريب جداً

4. ساعات الطفل يبقى عنده حول انسي وساعات وحشي وساعات مفيش حول خالص

5. آخر حاجة ممكن تحصل في دوين ان الطفل نلاقيه عاوج رقبته على طول عشان مش عارف يحرك عينه للجنب 

طيب هو مرض متلازمة دوين الملخبط ده العملية بتقدر تعالج كل الحاجات دي  ؟؟

العملية بتعالج 4 حاجات بس :

أولا: لو فيه حول انسي او وحشي بيتعالج بالعملية

ثانيا: لو العين ضيقة قوي .. بعد العملية هتبقى في نفس وسع العين التانية

ثالثا: العين مش حتطلع لفوق أو تنزل لتحت تاني بعد العملية والعين المختفية دي بترجع لمكانها الطبيعي

رابعا: رقبة الطفل هتتعدل .. مش هتتعوج تاني بعد العملية

الحاجة الخامسة اللي مش بتتعالج بالعملية ان العين برضه لما تيجي تبص للجنب مش هتعرف تروح للجنب ولازم الامهات يعرفوا كده قبل العملية

عشان كده أي أم بتسألني عن ابنها اللي عنده متلازمة دوين " نعمله العملية ولا لأ يادكتور جمال ؟ "

الإجابة واضحة جداً يا جماعة " شوفي يامدام ابنك لوعنده حاجة من الحاجات الأربعة اللي العملية بتعالجها يبقى نعمله العملية .. لكن لو ابنك كل مشكلته ان عينه مش بتروح للجنب ومفيش عنده حاجة تانية يبقى متعمليش العملية لأن عينه بعد العملية برضه مش هتروح للجنب "

ندى عندها متلازمة دوين .. فيها حاجة مهمة جداً من الحاجات اللي قلناها هيتصلحوا بالعملية

ندى لما تبص لليمين نلاقي العين اللي فيها دوين بتطلع لفوق خالص لدرجة انها بتختفي وشكل البنت بيبقى وحش أوي .. واحنا قلنا ان العين المختفية في متلازمة دوين من الحاجات اللي بتتعالج بالعملية

وفعلاً ندى بعد العملية الموضوع ده اتصلح بنسبة 100 % وبقت بتبص يمين عادي جداً وعينها المختفية رجعت لشكلها الطبيعي زي أي طفلة طبيعية

حمد الله على سلامتك يا حبيبتي

د. جمــال صبـــحي