حالة هذا الأسبوع 153

دنيا رزق .. 3 سنوات .. من حلوان

" متلازمة دوين .. نعمل عملية ولا لأ "

متلازمة دوين مرض خلقي .. يعني الطفل بيتولد كده .. المرض ده بيصيب عضلات العين ويخليها تشتغل بطريقة ملخبطة

سبب متلازمة دوين ان الاعصاب اللي بتحرك العين بتشتغل في نفس الوقت وعكس بعض .. يعني مثلا ييجي الطفل يبص لليمين يقوم العصب بتاع الحركه الشمال هو اللي يشتغل ويشد العين ناحيته .. فالعين متعرفش تروح يمين ..  عشان كده مرض متلازمة دوين له اشكال وانواع كتيرة قوي

المهم .. فيه 5 حاجات ممكن تحصل في مرض متلازمة دوين .. ساعات الطفل يبقى عنده الخمس حاجات مع بعض .. وساعات نلاقي عنده حاجة واحدة بس أو حاجتين أو أكتر .. الخمس حاجات دي هي :

1. العين اللي فيها دوين مش بتتحرك للجنب

2. عشان العضلة اليمين والعضلة الشمال بيشدوا العين في نفس الوقت فالعين ترجع لورا .. فساعات نلاقي العين تضيق وتبان اصغر من العين التانية بكتير

3. الاطفال دول لما يبصوا للجنب ساعات تلاقي العين اللي فيها دوين بتطلع لفوق وساعات بتنزل لتحت

4. ساعات الطفل يبقى عنده حول انسي وساعات وحشي وساعات مفيش حول خالص

5. آخر حاجة ممكن تحصل في دوين ان الطفل نلاقيه عاوج رقبته على طول عشان مش عارف يحرك عينه للجنب 

طيب هو مرض متلازمة دوين الملخبط ده العملية بتقدر تعالج كل الحاجات دي  ؟؟

بصراحة يا جماعة .. العملية بتعالج 4 حاجات بس :

أولا: لو فيه حول انسي او وحشي بيتعالج بالعملية

ثانيا: لو العين ضيقة قوي .. بعد العملية هتبقى في نفس وسع العين التانية

ثالثا: العين مش حتطلع لفوق أو تنزل لتحت تاني بعد العملية

رابعا: رقبة الطفل هتتعدل .. مش هتتعوج تاني بعد العملية

الحاجة الخامسة اللي مش بتتعالج بالعملية ان العين برضه لما تيجي تبص للجنب مش هتعرف تروح للجنب ولازم الامهات يعرفوا كده قبل العملية

عشان كده أي أم بتسألني عن ابنها اللي عنده متلازمة دوين " نعمله العملية ولا لأ يادكتور جمال ؟ "

الإجابة واضحة جداً يا جماعة " شوفي يامدام ابنك لوعنده حاجة من الحاجات الأربعة اللي العملية بتعالجها يبقى نعمله العملية .. لكن لو ابنك كل مشكلته ان عينه مش بتروح للجنب ومفيش عنده حاجة تانية يبقى متعمليش العملية لأن عينه بعد العملية برضه مش هتروح للجنب "

دنيا عندها متلازمة دوين .. فيها حاجتين من الحاجات اللي قلناها هيتصلحوا بالعملية

رقبتها معووجة على طول .. وطبعاً العملية هتخلي رقبتها تتعدل

وعندها حول انسي .. وطبعاً العملية هتعدل الحول ده

وفعلاً دنيا بعد العملية بقت أحسن الف مرة صحيح العين برضه مش بتتحرك للجنب لكن الحول الانسي اختفى تماما ورقبتها اللي كانت معووجة بقت عادية خالص

حمد الله على سلامتك يا حبيبتي

د. جمــال صبـــحي