حالة هذا الأسبوع ( 38 ) : هدير عبد البصير .. 3 سنوات .. من الوادي الجديد

" متلازمة دوين "

" دوين " يا جماعة هو اسم الدكتور اللي اكتشف المرض الغريب ده وسماه على اسمه

وكلمة " متلازمة " معناها ان بيحصل كذا حاجة في العين مش حاجة واحدة بس

-                                                                                            كتير من الأمهات بيبعتوا يسألوني علي متلازمة دوين لأنه في الحقيقة مرض غامض مش مفهوم قوي زي بقية انواع الحول وعشان كده بمناسبة حالة هدير انا حابب اشرح للأمهات مرض متلازمة دوين ..

متلازمة دوين يا جماعة مرض خلقي .. يعني الطفل بيتولد كده .. المرض ده بيصيب عضلات العين ويخليها تشتغل بطريقة غريبة جداً ....

سببه ان الاعصاب اللي بتحرك العين بتتلخبط وهي بتشتغل .. يعني مثلا ييجي الطفل يبص لليمين يقوم العصب بتاع الحركة الشمال هو اللي يشتغل ويشد العين ناحيته .. فالعين متعرفش تروح لليمين .. وساعات العكس فالعين متعرفش تروح للشمال .. وساعات تبقى الدنيا متلخبطة خالص فالعين متعرفش تروح لا لليمين ولا للشمال ..وعشان كدة نلاقي الدكاترة يقولوا للأم :

" بنتك يا مدام عندها متلازمة دوين من النوع الأول أو النوع التاني أو الثالث " .. حسب العين مش عارفة تروح لفين .. زي ماقلنا ..

-                                                                                            يبقى دي ياجماعة اول حاجة بتحصل في دوين

-                                                                                            " العين اللي فيها مرض دوين مبتعرفش تروح يمين أو شمال وساعات مبتعرفش تروح لا هنا ولا هنا "

-                                                                                             

تاني حاجة بتحصل في متلازمة دوين نتيجة ان العضلة اليمين والعضلة الشمال بيشدوا العين في نفس الوقت فالعين ترجع لورا .. فنلاقي العين تضيق وتبان اصغر من العين التانية

" يبقى تاني حاجة بتحصل للعين اللي فيها دوين انها بتبان اصغر من العين التانية "

تالت حاجة بتحصل في الاطفال دول لما ييجوا يبصوا للجنب تلاقي العين اللي فيها دوين بتطلع لفوق – وساعات بتنزل لتحت

حاجة رابعة بتحصل مع دوين ان العيان وهو باصص لقدام .. عادي يعني .. بيبقى عنده حول .. ساعات حول انسي يعني العين تنحرف لجوة وساعات وحشي يعني العين تنحرف لبرة

آخر حاجة بتحصل في دوين ان الطفل بيعوج رقبته عشان مش عارف يحرك عينه للجنب – بيبص براسه يعني مش بعينيه –

هدير يا جماعة عندها دوين في العين اليمين .. وعندها كذا حاجة من حاجات دوين:

العين مش عارفة تبص للشمال

العين اليمين باينة اصغر من الشمال

العين اليمين بتنزل لتحت

وعندها حول وحشي

طيب هو مرض متلازمة دوين الملخبط ده العملية بتقدر تعالج كل الحاجات دي  ؟؟

اقول لكم بصراحة يا جماعة .. العملية مش بتعالج كل الحاجات اللي قلناها دي .. بتعالج حاجات ومش بتعالج حاجات تانية .. لكن عموماً الطفل بيبقى احسن الف مرة بعد العملية ودايماً الاقي الامهات بعد العملية بيبقوا مبسوطين قوي بالحاجات اللي اتعالجت عند ولادهم اللي عندهم المرض الغريب ده

طيب ايه يا جماعة اللي بيتعالج في دوين وايه اللي ما بيتعالجش ؟؟؟

أولا: اذا كان فيه حول انسي او وحشي بيتعالج بالعملية

ثانيا: العين مش حتضيق تاني بعد العملية وهتبقى في نفس وسع العين التانية

ثالثا: العين مش حتطلع لفوق أو تنزل لتحت تاني بعد العملية

رابعا: رقبة الطفل مش حتتعوج تاني بعد العملية

لكن فيه حاجة مهمة عند الطفل مش حتتعالج بالعملية ان العين برضه لما تيجي تبص للجنب مش حتعرف هتعرف تروح للآخر ولازم الامهات يعرفوا الحكاية دي قبل العملية

وصدقوني يا جماعة نتايج العمليات عند الاطفال دول ممتازة .. وبلاقي الاب والام فرحانين جداً بعد العملية بالانجاز اللي تم .. حوالي 90% من المشكلة اتحلت .. زي عملية هدير كده ...

حمد الله على سلامتك يا حبيبتي  .. والف مبروك...

د. جمــال صبـــحي