|
حالة هذا الاسبوع ( 140 ) عبد الله خالد .. سنه
ونص .. من القاهرة
" الإعاقه المنغوليه والحول الأنسي "
تصحيح بس عايز اوضحه في الأول .. كلمة " منغولي "
دي
مش كلمه وحشه زي ما ناس كتبر فاكره .. منغولي يا جماعه
يعني من آسيا .. يعني شبه الصينيين واليابانيين كده .. بس
خلاص
هكلمكم
النهارده .. عن حبايبنا الصغيرين اللي ربنا بيبعتهم لينا
عشان ينوروا بيوتنا ويملوها فرحه وبركه .. يمكن في الأول
بنتلخبط ونتخض لما دكتور الاطفال يقول لنا ان بنتنا او
ابننا عنده اعاقه منغوليه .. او عنده " متلازمة داون "
..
بنقعد شويه زعلانين وشايلين الهم .. لكن مع الوقت بنحس ان
ربنا ادانا هديه جميله في صورة امتحان اجمل ..
عدد كبير من الولاد دول بتكون نسبة ذكائهم معقوله
جداً .. وبالرعايه والتعب والدمج مع الاطفال العاديين أو
حتى بالتعليم الخاص بنقدر نعلمهم وندربهم ونكبرهم وهما
شطار معتمدين على نفسهم زيهم زي اصحابهم وزمايلهم .. كتير
منهم بيكبروا ويعرفوا يقروا ويكتبوا وياكلوا لوحدهم
ويخرجوا ويمارسوا رياضه ..
عادي خالص
وهما بيبيهات .. الملايكه الطيبين دول ملامحهم
بتكون مميزه جداً .. عيونهم الآسيويه الجميله .. دقنهم
الصغيره المدوره .. شعرهم الاسود السايح .. رقبتهم القصيره
.. وبقهم الصغنون أوي اللي مش بيساع لسانهم .. شكلهم فعلاً
يلفت انتباه أي حد ويخطفوا قلب الواحد لما يبصلهم .. بمجرد
ما تضحك لهم تفاجأ بأنهم برضه بيضحكوا لك بابتسامه كلها
طيبه وحنان
حالة عبد الله النهارده هتخليني اكلمكم عن علاقة
المرض ده بالحول .. نسبه كبيره من الولاد دول - حوالي 20%
منهم بيبقى عندهم حول انسي .. يعني عينيهم بتخش لجوه .. زي
بالظبط الحول الانسي اللي بييجي للاطفال العاديين اللي
عرضت عليكم حالاتهم كتير في حالة هذا الاسبوع .. الحول
اللي اسمه " الحول الانسي للاطفال الرضع " .. وزي مانتم
عارفيين .. الحول ده علاجه عمليه .. ملهوش علاج تاني ..
وزي مانتم عارفين برضه العمليه لازم تتعمل بدري قبل مالعين
الحوله تضعف ويحصل لها كسل .. عكس كلام كل الامهات اللي
فاهمه انها تستنى كام سنه كده وبعدين تبقى تعمل العمليه ..
غلط .. اكبر غلط .. وخصوصاً في الاطفال اللي عندهم متلازمة
داون دول .. مفيش حاجه اسمها بلاش وجع دماغ .. كفايه اللي
هما فيه .. كمان هنعمل لهم عمليه في عينهم .. التفكير
بالطريقه دي سلبي جداً وبيزود المشكله مش بيخففها
..
احنا عايزين نعالج مشكلتهم أصلاً .. مش ناقصه اننا نزود
مشكلتهم ونحط عليها مشكله تانيه وعينهم تضعف وتكسل ونقعد
نعالج في الكسل والضعف .. هما مش ناقصين مشاكل تانيه والله
.. وطبعا لما نعمل العمليه والحول يتعدل اكيد برضه هيبقى
ليه تأثير ايجابي لما ندمج الولاد دول مع باقي الاطفال في
المدرسه وكده ..
مامة عبد الله اقتنعت بكلامي .. ست هايله .. كانت
عايزه تدي ابنها أي فرصه للتقدم للامام .. مش عايزه اي
حاجه تأخره .. عملت العمليه لعبد الله تاني يوم .. الحمد
لله .. نتيجة العمليه ممتازه .. الحول اتعدل تماماً .. عبد
الله هيكمل حياته كده ان شاء الله .. شكله جميل ونظره كويس
.. الف مبروك يا بودي وحمد الله على سلامتك يا ابني
د. جمال صبحي
|
.jpg)
