حالة هذا الأسبوع : م.م.عبد الله 19 سنة.. من ايتاي البارود .. البحيرة

الحول الوحشي المعكوس

لما عيان يخش يعمل عملية عشان عنده حول انسي ( يعني عينه داخلة لجوة ) .. وبعد العملية يشيل الغطا عشان يشوف عينه اتعدلت ولا لأ .. فيتفاجأ ان عينه باصة لبرة .. بدل ما كانت باصة لجوة بقت باصة لبرة ..  يعني عينه اتحولت على الناحية التانية .. ده ياجماعة اسمه الحول المعكوس .. يعني حول انسي اتحول لحول وحشي .. وبرضه لما حول وحشي يتحول لحول انسي .. برضه بنسميه " الحول المعكوس "

م.م. البنت الطيبة دي من يومين راحت تعمل عملية حول انسي في عينها اليمين.. ورتني صورتها قبل العملية .. فعلاً عندها حول انسي .. عينها اليمين داخلة لجوة ناحية الانف .. اللي قدامكم دي صورتها وهي عينها حمرا بعد العملية بيومين .. زي مانتم شايفين عينها اتحولت على الناحية التانية ..

ايه اللي حصل .. ليه العين حولت على الناحية التانية

اسباب الحول المعكوس كتيرة .. ممكن تكون الدكتورة اللي عملت لها العملية اتلخبطت .. بدل ما تقصر العضلة طولتها .. او بدل ماتطول العضلة قصرتها .. او تكون اشتغلت على العضلة الغلط .. او تكون اخدت مقاسات غلط قبل العملية .. فصلحت الحول اكتر من المطلوب فعكسته على الناحية التانية .. اسباب كتيرة .. في الحقيقة ياجماعة  في حالات الحول المعكوس انا مبعرفش ايه اللي حصل الا لما افتح بنفسي عشان اعدل الحول المعكوس .. ساعتها بس باكتشف السبب ..

المهم في الموضوع ياجماعة ان أي حد لاقدر الله دخل يعمل عملية حول وحصله زي ما حصل للبنت م.م. دي ( يعني خرج من العملية لقى عينه حولت على الناحية التانية ) .. لازم يعرف انه محتاج عملية تانية .. ولازم تكون بسرعة .. اوعى حد يصدق الكلام اللي ساعات باسمعه .. كله غلط في غلط:

* " استنى شوية بكرة العين حتتظبط لوحدها لما العضلات تشد "

* " اعمل تمارين بس للعين عشان نقوي العضلة شوية "

* " بس حنعمل نظارة وهي حتعدل شوية الحول دول "

* " لازم نستنى كام شهر كده لما الجرح ينشف عشان نقدر نعمل عملية تانية "

كل الكلام ده مش صح .. عمر الحول المعكوس ما هيتعدل لوحده أبدا الا بعمل عملية تانية .. لازم الغلط يتصلح .. ويتصلح فوراً قبل العضلة ماتلحم في مكانها الجديد الغلط وتلزق وتبقى العملية بعد كده اصعب واصعب

الانسة م.م. اقتنعت تماما بكلامي وانها المفروض تعمل عملية تاني .. مع انها لسه عاملة اول امبارح .. ومع ان مامتها كانت معارضة جداً انها تخش بعد يومين تعمل في عينها عملية تانية .. وتاخد بنج تاني .. م.م. كانت شجاعة وهايلة .. فعلاً انقذت نفسها

دخلت فعلأ تالت يوم العملية الاولى .. لقيت سبب انعكاس الحول .. الدكتورة كانت عملت غلطة مشهورة .. مش هاقولها .. المهم الحمد لله .. لقيت الدنيا لسه زي ماهي .. مفيش اي صعوبة .. العضلة سليمة وزي الفل .. بس حطيتها في مكانها الصح .. وكانت النتيجة رائعة .. عملية تفرح بجد .. حمد الله على سلامتك يابنتي .. والف بعد الشر عليكي

د. جمــال صبـــحي