حالة هذا الاسبوع ( 287 )

البنت القمر دي كان عندها حول مشهور جداً اسمه الحول الوحشي المتقطع .. يعني عينيها كانت بتحول لبره .. أنا كلمتكم عن الحول ده كتير وأكيد كلكم عارفينه
عملت لها العملية عادي .. وتاني يوم مامتها كلمتني وهي مرعوبة وقالت لي ان عينيها دخلت لجوه يا دكتور جمال .. يعني بدل البنت ما كانت بتحول لبره .. دلوقتي بتحول لجوه .. بعد ماكان عندها حول وحشي بقى عندها حول أنسي .. وبعتت لي صورتها على الواتس .. زي مانتم شايفين تاني يوم العملية فعلاً عينيها داخله لجوه

إيه اللي حصل ياجماعة .. أنا هأكلمكم دلوقتي على حاجة معروفة عندنا ولازم كل الأمهات يعرفوها اسمها:

" الحول الانسي المعكوس "

فيه يا جماعة نسبة قليلة من الحالات اللي عندها حول وحشي متقطع .. بنتفاجئ بعد العملية ان الحول الوحشي اللي كان عندهم اتقلب بقى حول انسي .. ده اللي بنسميه " الحول الانسي المعكوس " ... النسبة دي لاتزيد عن 11% في معظم المراجع الطبية .. وعندي برضه نفس النسبة تقريباً .. يعني من كل 100 طفل عندهم حول وحشي متقطع 90 طفل تقريباً يبقوا زي الفل بعد ما اعمل لهم العملية و10 بس يحصل لهم حول انسي معكوس .. مع ان كلهم عملت لهم نفس العملية بنفس الطريقة  وبنفس الدكتور " انا يعني " ..  في الحقيقة ياجماعة اسباب الحول الانسي المعكوس مش معروفة .. لكن بيحصل

طيب ايه الحل ؟

القواعد الطبية بتقول لازم نستنى شهرين .. الغالبية العظمى منهم بيتعدلوا لوحدهم من غير أي علاج .. وقلة قليلة بيفضل الحول الانسي المعكوس عندهم وما يروحش .. دول بيحتاجوا عملية تانية ..  بس لازم نستنى شهرين .. كل الدكاترة وكل المراجع وكل المراكز الطبية متفقين على موضوع الشهرين .. ليه لازم نستنى ؟ .. لأن معظم الحالات عينيها بتتعدل لوحدها من غير عملية تانية ولا حاجه في خلال الشهرين دول .. زي حالة النهارده .. بعد شهر من العملية مامتها بعتت لي الصورة دي وهي فرحانه جداً ان بنتها طلعت من الغالبية العظمى اللي خفوا من الحول الأنسي المعكوس لوحدهم من غير عمليه تانية