حالة هذا الاسبوع ( 49 ) الحول الانسي المعكوس

حالة هذا الاسبوع  في الحقيقة 3 حالات مش حالة واحدة .. التلاتة حصلوا في نفس الاسبوع بطريقة غريبة جداً .. مع ان النوع ده من الحول يا جماعة مش بيحصل كتير .. سبحان الله .. 3 حالات في اسبوع واحد .. انا عندي الشجاعة الكافية اني احكي لكم ايه اللي حصل لي في الاسبوع ده

الحالة الأولى

جرس تليفون العيادة بيرن :

-          انا دكتور جمال صبحي .. تحت امرك يافندم

-          انا محمود غريب باكلمك من الاسكندرية .. بنتي " بسنت " عندها 8 سنين .. كان عندها حول وحشي متقطع يعني عينيها كانت بتحدف لبرة .. عملت لها عملية هنا في اسكندرية امبارح عند دكتور شاطر .. لما روحت وشلت الغطا من على عينيها لقيت عندها حول انسي .. يعني العين عكست يادكتور جمال .. كانت بتحدف لبرة قبل العملية .. دلوقتي بعد العملية بتحدف لجوة .. اعمل ايه يادكتور .. تنصحني بإيه ؟ .. انا قلقان عليها قوي .. كده تبقى العملية اتعملت غلط ولا إيه ؟

الحالة التانية

بعد 5 دقائق بالظبط .. تليفون تاني

انا مامة " ريماس "  يا دكتور جمال اللي حضرتك عملت لها العملية النهاردة .. اللي كان عندها حول وحشي متقطع .. لما روحنا من المستشفى وشلت الغطا من على عينيها .. لقيت عندها حول انسي .. انا من الصبح ما بطلتش عياط .. ارجوك قولي ايه الحل دلوقتي ؟

الحالة التالتة

بعد 5 دقائق كمان .. تليفون تالت

انا جرجس يادكتور جمال .. والد " فادي " اللي عملت له حضرتك عملية الحول الوحشي النهاردة .. فادي يا دكتور جمال دلوقتي عنده حول انسي .. الحول عكس على الناحية التانية .. بدل ماكان لبرة .. دلوقتي لجوة .. نعمل ايه دلوقتي ؟

" الحول الانسي المعكوس "

فيه يا جماعة نسبة قليلة قوي من الحالات اللي عندها حول وحشي متقطع .. بنتفاجئ بعد العملية ان الحول الوحشي اللي كان عندهم اتقلب بقى حول انسي .. ده اللي بنسميه " الحول الانسي المعكوس " ... النسبة دي لاتزيد عن 11% في معظم المراجع الطبية .. وعندي برضه نفس النسبة تقريباً .. يعني من كل 100 عيان عندهم حول وحشي متقطع 90 عيان تقريباً يبقوا زي الفل بعد ما اعمل لهم العملية و10 عيانين بس يحصل لهم حول انسي معكوس .. مع ان كلهم عملت لهم نفس العملية بنفس الطريقة  وبنفس الدكتور " انا يعني " ..  في الحقيقة ياجماعة الاسباب مش معروفة .. لكن بتحصل

طيب ايه الحل ؟

لازم نستنى شهرين .. الغالبية العظمى منهم بيتعدلوا لوحدهم من غير أي علاج .. وقلة قليلة بيفضل الحول الانسي المعكوس عندهم وما يروحش .. دول بيحتاجوا عملية تانية عشان الحول الانسي .. مش هتصدقوا لو قلت لكم ان نسبة نجاح العملية التانية ياجماعة بتكون 100% .. من غير مبالغة والله .. نسبة نجاح عملية الحول الانسي المعكوس تصل الى 100%

طيب .. ال 11% بتوعي انا خلصتهم في اسبوع واحد .. عشان كده انا بدأت كلامي بأنها حاجة غريبة .. المهم ياجماعة انا رديت على المكالمات التلاتة نفس الرد :

-          " بسنت " تتابع في اسكندرية مع الدكتور بتاعها يافندم لمدة شهرين .. ده دكتور ممتاز وانا اثق فيه جداً .. ونشوف ربنا يسهل يمكن تتعدل لوحدها

-          " ريماس " يا مدام نستنى عليها شوية كده ونشوف .. ربنا يسهل ومانحتاجش عملية تانية

-          يا استاذ جرجس هنصبر على " فادي " شهرين .. ربنا يسهل .. بعد الشهرين نشوف نعمل ايه

-           

تليفون العيادة .. بعد شهرين

-          انا والد " بسنت "  يا دكتور جمال .. باكلمك من اسكندرية .. عينيها زي ماهي .. مفيش اي تحسن .. انا عايز آجي مصر اعمل العملية عندك

-          انا مامة " ريماس " يا دكتور جمال .. ريماس زي ماهي .. عينيها ماتعدلتش .. لسه داخلة لجوة

-          انا جرجس يا دكتور جمال .. الحمد لله " فادي " عينيه اتعدلت لوحدها .. زي مانت قلت بعد شهرين بالظبط

" فادي " اتعدل لوحده .. والحمد لله

بس  " بسنت "  و " ريماس " عملت لهم عملية تاني الاسبوع اللي فات .. النهاردة كانت الاستشارة بتاعتهم .. الحمد لله الاتنين نتيجتهم رائعة  .. معلش يا جماعة .. عملتوا العملية مرتين .. تعبناكم معانا .. مش غلطتنا والله .. دي حاجة ساعات بتحصل .. لكن الحمد لله في الآخر الولاد زي الفل

د. جمـال صـبحي