حالة هذا الأسبوع ( 154 )  : عبد الله مطلق .. 6 شهور .. من الكويت

" الحول الوحشي للاطفال الرضع "

الحول ده حول نادر - بعكس الحول الأنسي - وساعات لما بنفحص البيبيهات دول بنلاقي عندهم مرض في العين الحوله خلا نظرها ضعيف ( حاجه في الشبكية .. حاجه في العصب .. حاجه من اكسجين الحضانة لو كان البيبي دخل حضانة كتير ) .. ولما العين ضعفت حولت لبره .. وبيكون هدفنا الرئيسي في الحالات دي قبل ما نعمل عملية ونعدل الحول اننا نعالج المرض اللي خلا العين ضعيفة .. لأن ده هو المهم .. أهم من الحول نفسه ..  

 أول حاجة قلتها للأستاذ مطلق والد عبد الله :

" لازم نفحص قاع العين الأول .. أحسن يكون فيه سبب لاقدر الله في الشبكية أو العصب البصري خلا العين تحول بالمنظر ده .. لو لقينا حاجه يافندم لازم نعالجها الأول .. سيبك من الحول دلوقتي .. خلي الحول آخر حاجة نفكر فيها .. الحول أمره سهل .. المهم لو عبد الله عينه فيها مشكلة خلت العين تضعف وتحول يبقى لازم نعالج المشكلة دي الأول عشان الولد يرجع يشوف بيها تاني " 

بعد ماكشفت على عبد الله لقيت قاع العين سليم والشبكية سليمة وكل حاجة تمام التمام والمشكلة مشكلة حول بس ..

عبد الله يا افندم قاع العين عنده سليم .. الحول اللي عنده ناتج من ضعف في عضلات العين .. بس برضه لازم نعمله عملية عشان نعدل الحول .. العين الحوله لو سبناها كده هتضعف أكتر وأكتر مع الوقت ويحصل لها كسل

فيه هنا حاجة حابب أقولها قبل ما نكمل موضوع عبد الله .. البيبيهات اللي عندهم حول وحشي يا جماعة وعينيهم بتحدف لبره  كده زي عبد الله واستمر الوضع كده لحد الشهر السادس مش بيخفوا لوحدهم أبداً .. الولاد دول عينيهم بتتعدل بالعملية بس .. إوعوا تصدقوا المقولة الشائعة الغلط اللي بعض الأمهات بيكتبوها على صفحتي ( ابني كان كده وعينه اتعدلت لوحدها من غير عملية ولا حاجة ) .. أو المقولة التانية ( ابني كان كده وعمل نضارة وعينه اتعدلت من غير عملية ولا حاجة ) .. طبعاً ده كلام مش صح .. مفيش في الطب حاجة اسمها بيبي عنده 6 شهور وعنده حول وحشي وعينه اتعدلت لوحدها .. وبرضه مفيش في الطب حاجة اسمها حول وحشي بيتعدل بالنضارة  .. الحول الأنسي ياجماعة هو اللي بيتعدل بالنضارة لكن الحول الوحشي مش ممكن يتعدل بالنضارة .. طبعاً كلكم عارفين ان البيبيهات اللي لسه عندهم شهر ولا شهرين وعضلات العين لسه نموها مش كامل بيحصل لهم حول ولما بيكبروا عينيهم بتتعدل لوحدها .. دي حاجة طبيعية وكل الامهات والجدات عارفينها .. احنا مش بنتكلم على كده .. احنا بتكلم عن الحول اللي استمر لحد الشهر السادس واللي بنسميه الحول الوحشي للأطفال الرضع .. ده اللي مش بيتعدل لوحده أبداً.

المهم .. عملت العملية ل عبد الله تاني يوم الصبح .. دي صورته بعد شهر من العملية

عمليته حلوة قوي .. الحول اتعدل .. عبد الله احتاج شوية تمارين تغطية عشان ننشط العين بعد العملية لأنها كانت ضعفت شوية .. الحمد لله الحول اتعدل والعين كمان رجع نظرها طبيعي وزي الفل

حمد الله على سلامتك يا ابني وألف مبروك 

د. جمــال صبـــحي