حالة هذا الأسبوع ( 117 )  : حسن اسامه طه .. 7 سنين .. من دمياط

الحول الوحشي عند الاطفال

الحول ده يا جماعه من اشهر اسباب الكسل الوظيفي وضعف النظر عند الاطفال .. دايماً باكتب على صفحتي الحول الوحشي عند الاطفال لازم يتعالج فوراً .. مفيش حاجه اسمها طيب نستنى شويه لما الولد يكبر ويستحمل العمليه .. او نستنى كام سنه كده يمكن الحول يتعدل لوحده .. الكلام ده اكبر غلط .. اكبر غلط

الحول يا جماعه مش موضوع شكل بس .. مش عايزين الولد يبقى أمور وخلاص .. لأ طبعاً .. دي فكره غلط خالص عند معظم الأمهات .. طبعاً الشكل حاجه مهمه مفيش كلام .. لكن الأهم من الشكل النظر .. عندي انا النظر أهم بكتير من الشكل .. يعني ايه فايدة شكل حلو وعين ضعيفه مش بتشوف ..

انا باقول الكلام ده بمناسبة حالة " حسن " .. الولد ده بدأ الحول عنده من سن سنتين .. مامته راحت لدكاتره كتير .. كلهم قالوا نفس الكلام .. ده حول وحشي ملهوش علاج الا العمليه .. مامته رفضت .. الولد لسه صغير .. نستنى شويه لما يكبر ونبقى نعملها .. والكلام اللي انتم كلكم عارفينه

المهم .. الحول الوحشي عند الاطفال بيخلي العين الحوله تضعف شويه بشويه .. وكل ما نعمل العمليه بسرعه كل ما كان احسن عشان نلحق العين قبل ما تكسل وتضعف .. ولو الولد كبر بالحول ده زي "حسن " كده .. بيبقى عندنا مشكلتين .. مشكلة الحول والمشكلة الأكبر وهي الضعف والكسل .. بنعالج الحول بعمليه طبعاً .. وبنعالج الكسل بتنشيط الابصار وتغطية العين السليمه وكده .. كل ما الولد كان صغير والكسل بسيط .. كل ما العلاج بيبقى سهل ونتيجته كويسه .. وكل ما الولد كان كبير كل ما كان علاج الكسل صعب جداً .. وساعات بيكون مستحيل ..

" حسن" الحمد لله عمل العمليه وعينه اتعدلت .. وبعدها ابتدينا نعالج الكسل لمدة 6 شهور لأن الولد كان كبير والحول عنده من سن سنتين .. لكن الحمد لله علاج الكسل نجح برضه والعين رجعت تشوف كويس زي العين التانيه بالظبط

الف سلامه عليك يا حبيبي

وحمد الله على سلامتك  

د. جمــال صبـــحي