|
حالة هذا الأسبوع ( 56 )
: احمد محمود الشيخ .. 13 شهر ..
من اسيوط
الحول الوحشي للاطفال الرضع
الحول ده يا جماعة نادر جدا .. وظهوره عند
البيبيهات دول بيكون عبارة عن انذار لمشكلة موجودة أصلا في
عين البيبي .. مشكلة اكبر من الحول نفسه
لما يكون بيبي صغير يا جماعة عنده عين شايفة
والعين التانية مش شايفة كويس .. العين الضعيفة بتحول ..
وعادة تحول لبرة زي احمد كده .. كأن البيبي
عايز يقول لنا " عيني الحولة دي
مش باشوف بيها كويس "
وكتيرلما
بنفحص البيبيهات دول نلاقي فعلا عندهم مرض خلا النظر ضعيف
جداً .. وعشان كده انا دايماً احذر الأمهات .. يا جماعة أي
بيبي عنده حول وحشي يعني عينه حدفت لبرة .. دي حاجة مهمة
جداً .. جداً .. لازم البيبي يتفحص فوراً .. وفوراً يعني
فوراً .. أحسن يكون عنده حاجة في عينه ولازم تتعالج بسرعة
( زي مشاكل الشبكية اللي بتيجي من حضانات المبتسرين .. وزي
المية البيضاء عند الاطفال الرضع .
احمد أول حاجة قلتها لمامته " أول حاجة يا مدام
لازم نفحص عين احمد الحولة دي ونتأكد انه بيشوف بيها كويس
.. مش مهم الحول دلوقتي .. خلي الحول ده آخر حاجة نفكر
فيها .. الأول نطمن على الولد "
فحصت عين احمد .. الحمد لله لقيته زي الفل .. قاع
العين سليم والشبكية سليمة
" احمد يا افندم نظره ما فيهوش اي مشكلة ..
الحول اللي عنده ناتج من ضعف في عضلات العين .. بس لازم
نعمله عملية بسرعة أحسن العين الحولة دي هتضعف مع الوقت
ويحصل لها كسل "
طبعا كلام الامهات اللي انتوا حفظتوه .. مانستنى
شوية ..
لما يكبر .. بيقولوا كل البيبيهات
كده .. يمكن الحول يتعدل لوحده .. بيقولوا الحول هيرجع
تاني .. الخ
طيب
.. نقول للمرة العشرين .. يا جماعة الحول الوحشي عند
البيبيهات دول مش بيتعدل لوحده أبداً .. وأبداً يعني أبداً
.. يعني عمرها ما حصلت .. مهما استنيتوا برضه هتعملوا
العملية .. كل مانعملها بدري كل ما كان احسن عشان العين
الحولة ماتضعفش
مامة احمد مع انها صعيدية .. بس دماغها ماكانتش
ناشفة خالص .. اقتنعت بكلامي بسرعة.. وعملت له العملية
تاني يوم على طول ..
احمد عمل العملية الصبح وجاني بعد كام ساعة كده في
العيادة عشان اشوفه ويسافروا اسيوط بليل في القطار
مشكلة الولد اتحلت .. الحمد لله .. يستاهل الحمد
حمد الله على سلامتك يا أستاذ .. وألف مبروك ...
بس ابقى افتكرني لما تكبر
د. جمــال صبـــحي
|
.jpg)
